Guovdageainnu ja Kárášjoga oktasaš nuoraidskuvlaprošeakta lea ožžon doarjaga Sámediggeráđis.
Guovdageainnu suohkana nuoraidskuvla lea ohcan doarjaga ovttas Kárášjoga gieldda skuvllain suohkangaskasaš seminárii oahpaheddjiid várás, ja Sámediggeráđđi juolluda dasa 300 000 ruvdnosaš doarjaga. Semináras galget logaldallamat sámi árvvuid birra ja fágaođastusa birra. Mihttu lea maid oahpásnuvvat sámi oahpahusfierpmádagaiguin, doppe galgá bargobádji, ja skuvllat galget ovdanbuktit iežaset plánaid muđui.
Prošeavtta namma lea Davvisámegiella skuvllas, mii gullo, oidno, vuhtto ja ovdánahtto, ja mihttu lea deaivvadit, oahpásnuvvat ja hukset oadjebasvuođa ránnjásuohkaniid pedagogaid gaskka, juogadit čehppodaga, ráhkadit oktasaš plánaid sámegiela oahpahussii, ja ráhkadit plána movt heivehit sámegiela buot fágaide sámi skuvllain.
– Dát prošeakta heive bures Giellaloktemii, mii lea Sámedikki strategiija sámi gielaid várás. Mii oaidnit ahte dárbbašuvvojit erenoamáš gealboloktenstrategiijat oahpaheddjiide, earret eará sámegiel čállin- ja lohkanoahpahusa ektui, guovttegielalašvuođapedagogihkas, nana oahpahusmodeallaid geavaheamis ja vugiin mat dahket ahte giellaoahpahus lihkostuvvá, dadjá Aili Keskitalo preassadieđáhusas.
