Duottar Herggiid jođiheaddji Aslak Sokki illuda go dán jagi fas ožžo spealloruhtadoarjaga fylkkagielddas, ja lohká dat lea okta vel lávki sin searvái ollašuhttit stuora Sápmi Valáštallanpárkka plána.
Duottar Herggiid jođiheaddji Aslak Sokki illuda go dán jagi fas ožžo spealloruhtadoarjaga fylkkagielddas, ja lohká dat lea okta vel lávki sin searvái ollašuhttit stuora Sápmi Valáštallanpárkka plána.
Duottar Hearggit searvi beassá dál huksegoahtit klubbavistti Gáhkkormarrasii Guovdageidnui, go searvi lea ožžon 567 000 ruvnno spealloruhtadoarjaga Finnmárkku fylkkagielddas.
Searvvi jođiheaddji ii lean gullan ge ovdal go Ávvir riŋgestii.
– Nu go?? Vuoi ihán, dál beassat huksegoahtit! illuda Aslak Sokki telefungeažis.
Nubbi ceahkki
Duottar Hearggit ožžo diibmá juo Finnmárkku Fylkkagielddas ruhtadeami heargevuodjinšilju ođasteapmái. Dainna bargguin eai leat vel ollásit geargan, ja dál leat vuordime dassážii go šillju goiká, vai besset gárvet dan. Dál bođii vel nubbi bargu sidjiide, namalassii klubbavistti hukset.
Jođiheaddji Aslak Sokki ii jierásnuva vaikke leat máŋga prošeavtta jođus. Son lohká searvvis leat vel stuorát plánat vuordimis.
Sii leat guhká bargan oččodit buori heargevuodjinšilju, klubbavistti ja njoarostanšilju Gáhkkormarrasii Guovdageidnui. Dien plánas váilu vel njoarostanšillju, masa maid ledje dál ohcan doarjaga, muhto eai ožžon.
– Mii leat bargan dán guvlui logi jagi, ja dá leat nubbi ceahkki. Lea oalle olahus go oažžut dán, lohká Aslak Sokki go Ávvir deaivvada suinna.
– Galgá seamma go Sámediggi lea Kárášjohkii
Duottar Hearggit searvvis lea oainnat stuorát plána go dušše heargevuodjin- ja njoarostanšilju ráhkadit. Sis lea Sámi valáštallanpárka jurdagis. Olles valáštallanpárka mas sámi valáštallan lea guovddážis.
– Galgá dovdomearkan Guovdageidnui, seamma go Sámediggi lea Kárášjogas. Dan guvlui mii leat bargame, ja dat galgá beassat geavahuvvot turistemii ja galgá ávkin gili olbmuide. Mii áigut geahččalit loktet sámi valáštallamiid, ja buorre go lea vejolaš dáppe loktet, ja go fylkkagielda ja spealloruđat min veahkehit, lohká Sokki.
Son lea positiivvalaš ja sus lea doaivva oažžut maiddái njoarostanšilljui doarjaga boahtteáiggis.
– Eat mii bala das go diehtit dat boahtá. Ii leat go vuorddašit, lohká Sokki.
Stuora plánat boahtteáigái
Doaivumis lea sihke heargevuodjinšillju ja klubbavisti gárvvis boahtte heargevuodjináigodahkii. Jođiheaddji čilge klubbavisti boahtá buorrin sidjiide go gilvvuid lágidit, vai áigeváldinrusttegiiguin siste leahkit.
Sokki lohká ge dá lea nubbi olahus Duottar Hearggit searvái.
– Mii lea dasto boahtte olahus?
– Go oažžut heargevuodjinšilju ja klubbavistti gárvvisin, de fertet álgit eambbo plánaid bidjat, ja stuoridit doppe. Plánat mis gal leat, muhto daid eat gille dál vel hupmat, moddje Aslak Sokki.
Oktiibuot 26,2 miljovnna
Duottar Hearggit searvi lea áidna searvi Guovdageainnus mii lea ožžon spealloruhtadoarjaga. Porsáŋggus leat njeallje doaimma ožžon doarjaga.
Porsáŋggu báhčinsearvi lea ožžon 369 000 ruvnno báhčinšilju divodeapmái. Golfaklubba North Cape Golf Club lea ožžon 303 000 ruvnno vistái gosa bidjet biergasiid. Stil IL lea ožžon 688 000 ruvnno klubbavistti divodeapmái. Porsáŋggu IL lea ožžon 159 000 ruvnno Leavnnja čuoiganláhttu ođasteapmái.
Oktiibuot lea Finnmárkku fylkkagielda juohkán 26,2 miljovnna ruvnno, 29 iešguđet doibmii. Measta bealli ohcamušain ožžo juolludemiid.
Stuorámus doarjaga oaččui Várjjat suohkan. Sii ožžo beali ohccojuvvon supmis, 15 miljovnna ruvnnos, vuojadanbasseŋgii.
– Dán jagáš ohcamušat čájehit ahte ain lea olu doaibma fylkkas, oččodit valástallanrusttegiid. Muhto lea dušše bealli suohkaniin mat ohcet. Lea illudahtti oaidnit ahte suohkanat nu go Davvesiida, Ákŋoluokta, Guovdageaidnu ja Fálesnuorri leat fas fárus, lohká váldolávdegotti jođiheaddji Geir Ove Bakken preassadieđáhusas.
