Muhtin dievdu guhte ássá Finnmárkkus lea áššáiduhtton áššis mas Tuolloetáhta lea duoguštan sexdohkáid mat leat olggosoaidnit dego mánát. Finnmárkku politiijaguovlu lea dutkan ášši jo moadde vahkku.
Muhtin dievdu guhte ássá Finnmárkkus lea áššáiduhtton áššis mas Tuolloetáhta lea duoguštan sexdohkáid mat leat olggosoaidnit dego mánát. Finnmárkku politiijaguovlu lea dutkan ášši jo moadde vahkku.
– Politiijaide lea hui dehálaš kártet olbmá, erenoamážit dan dáfus ahte sáhttá go leat dahkan eará vearrodaguid. Mii eat hálit muitalit duođi eambbo ášši birra dahje maid leat gávdnan, go dat sáhttá hehttet dutkama viidáseappot, lohká Finnmárkku politiijameašttir Ellen Katrine Hætta preassadieđáhusastis.
Son lasihastá vel ahte Finnmárkku politiijat atnet ášši duođalažžan.
Sulastahttet mánáide
Bearjadaga dat beakkehii ahte Tuolloetáhta lea maŋimuš mánuid duoguštan 21 sexdohká mat leat olggosoaidnit dego mánát Gardermoena girdišilljus.
Dáid dohkáid leat norgalaččat diŋgon, muhtimat dain ásset Tromssas ja Finnmárkkus.
– Olbmot geat diŋgojit diekkár dohkáid sáhttet leat illástan mánáid ovdalaččas, dahje sáhttet dahkat stuorát riska rohcošit mánáiguin boahtteáiggis. Danne lea hirbmat dehálaš ahte dát olbmot fuomášuvvojit, lohká Hætta.
Norgga ráŋggáštuslága mielde leat buot ovdanbuktimat mat seksualiserejit mánáid lobiheamet, ležžet dal mánát illástuvvon vai eai.
