Kárášjogas oidnui imašlaš čuovga almmis odne ovdal gaskabeaivvi, diibmu 10.15.
Nuorttabealde almmis oidnui dego násti luhččemin dahje dego komehta mii čuovggai ja jođii gulul máttás guvlui, diibmu 10.15 odne.
Ávvir lea váldán oktavuođa iešguđet ásahusaiguin gullan dihtii mii sáhttá leat oidnon almmis.
Ii oktage sáhtán vástidit.
Váldán oktavuođa
Ávvir lea váldán oktavuođa Suodjalusain, Norgga Ávusguovddážiin, Meteorologalaš instituhtain (met), politiijain ja Teorehtalaš astrofysihka instituhtain.
Teorehtalaš astrofysihka instituhtas čilgejedje ahte meterorihttá dábálaččat ii oidnos eará go moadde sekundda, danne eai jáhkkán dán leat meteorihttan go dat oidnui birrasiid golbma njeallje minuvtta ovdal go jávkkai bálvvaid duohkái.
Meteorologalaš instituhtas ges muitalit ahte sin satelihttagovain eai leat oaidnán dán dáhpáhusa.
Suodjalusas leat iskan ášši:
– Dál ii galgga leat makkár militeara doaibma mii heivešii diekkár čilgehussii, dadjá suodjalusa gulahallanolmmoš Ivar Moen
