Ovddádusbellodaga jođiheaddji Siv Jensen ii eahpit, Nuorta-Finnmárkku gearggusvuođas lea váilevašvuohta ja ferte nanusmahttojuvvot vel ovttain gádjunfatnasiin.
Bearjadaga lei Siv Jensen Álttás gádjunsearvvi guossis, gos son ovttas báikkálaš bellodatustibiiguin beasai deaivvadit sihke eaktodáhtolaš ja fásta bargiiguin guovtti dain njealji gádjunfatnasis maid gádjunsearvi hálddaša Finnmárkkus.
– Ovddádusbellodat lea ovdal geasi juo oaidnán ahte lea dárbu nanosmahttit Nuorta-Finnmárkku gearggusvuođa. Ovddádusbellodat háliida bargat dan ovdii ahte gádjunsearvi jahkásaččat oažžu 15 miljovnna ruvnno, vai ožžot ovtta vel gádjunfatnasa Nuorta-Finnmárkui, čállá Ovddádusbellodat preassadieđáhusas.
– Gádjunsearvi lea stuora oassi Norgga gearggusvuođas. Das váilu juoga Finnmárkkus. Dan dihte háliida OB juolludit 15 miljovnna ruvnno čavčča stádabušeahtas, vai ožžot ovtta vel fatnasa Nuorta-Finnmárkui, lohká Jensen.
Riddodoaimmahaga sihkarvuođaanaliissa mielde vurdojuvvo johtolat lassánit mearragáttiin boahtteáiggis, ja lassána eanemus davviguovlluin. Vurdojuvvo ahte táŋkaskiipajohtolat 2040 rádjái galgá lassánit 300 proseanttain.
Gádjunsearvi oaivvilda ahte jus sii galget nagodit daid hástalusaid, de ferte stuora gádjunfanas mas lea bissovaš bargoveahka, mas doaibmaguovlu lea nuorttabealde Báhcavuona. Gádjunsearvvi mearraossodaga direktevra, Tobias Bang-Hansen, lohká ahte diekkár fanas sáhttá leat anus juo boahtte jagi mielde.
– Báhcavuonas Girkonjárgii lea guhkimus gaska olles Norggas, gos ii leat gádjunfanas. Mii jáhkkit ja sávvat ahte go leat politihkkárat min bealde, de mii nagodit oažžut gádjunfatnasa Várggáide boahtte jagi mielde, lohká Bang-Hansen.
– Mis lea leamašan fiinna beaivi Siv Jenseniin Álttás. Ulbmil mátkkiin lei čájehit sutnje ja su mielbargiide Ovddádusbellodagas maid mii bargat, ja oktii vel deattuhit dárbbu nanosmahttit maritiima gearggusvuođa Finnmárkkus, lohká gádjunsearvvi presideanta, Nicolai Jarlsby.
