Váhnen Máret Biret Sárá Oskal lea evttohan ahte Deanu Sámeskuvlla rektor Berit Ranveig Nilssen ánssáša juovlafuomášumi.
– Deanu sámeskuvla ja rektor Berit Ranveig Nilssen ánssášit juovlafuomášumi. Sámeskuvla bukta ássanmovtta go nu vuđolaččat bargá sámegiela ovddidemiin ja láhčá dili vai giella galgá ovdánit mánáin, čállá váhnen Máret Biret Sárá Oskal iežas evttohusas.
Deanu sámeskuvla lea mielde prošeavttas «Gievrras giellamodealla» man ulbmil lea veahážiid mielde sámáidahttit mánáid stoahkangiela.
Lágidit gárdeskuvlla
– Muhto dat mii buot buoremus lea skuvllain, lea go čakčat rektor sádde oahpaheaddji ovtta orohaga ohppiide sin geasseorohahkii vai sii besset leat mielde boazobargguin čakčat. Geasseorohagas sii lágidit gárdeskuvlla guokte vahkku. Rektor lohka son dáhka dan go boazobargguin ohppet mánát dakkáriid maid skuvla ii máhte oahpahit. Midjiide váhnemiidda lea dat issoras buorre ortnet, ákkastallá Máret Biret Sárá Oskal.
Go Ávvir váldá oktavuođa Sámeskuvlla rektoriin, Berit Ranveig Nilssenin ja lohká jitnosit ákkastallama man váhnen lea sádden, de gal rektor illosa:
– Oi, dán gal lei somá gullat. Muhto in bargga eará go iežan barggu ja mus leat hui čeahpes bargit duogábealde geat leat buorit doarjjan, vástida Berit Ranveig.
Ávvudanveara
Rektor muitala ahte sii lávejit ávvudit skuvllas go positiiva fuomášumit leat sin birra, ja lohká dán ášši leamen buorren ođasin.
– Diet gal lea ávvudanveara vel. Duođaid somás ášši ja somá go boahtá váhnemiin, dadjá rektor.
Ávvudit juovlabasiid ruovttus
Berit Ranveig muitala ahte juovlabasiide bohtet su mánát ruoktot ja sus leat plánat ávvudit juovlabasiid ruovttus, bearrašiin.
– Eai leat ollu eará stuora plánat go čuovvut iežamet juovladábiid, finadit juovlagirkus, juovlagaskabeivviid borrat ja maid bovdet dan stuorabearraša, muitala Berit Ranveig Nilssen.
