Stádabušeahta 2021 ovddas leat iešguđetge rievdadusat stipeandaortnegis ohppiide skuvllas.
2021 stádabušeahttaevttohusas váldo stipeanda eret ohppiide geat háliidit buoridit árvosániid privatistaeksámenis. Dat eai ge lasit reaidostipeandda fidnofágalaš surggiide.
– Dat dušše nanne sosiála erohusaid maid mii juo oaidnit skuvllas ja sisaváldimis alitohppui, oaivvilda Kristin Schultz, Ohppiidorganisašuvnna jođiheaddji.
Son dadjá ahte joatkkaskuvlaoahppu lea unnán heivehuvvon ohppiide. Lea skuvla gos biddjojit rámmaid sisa, ja jos ii heive daidda, de duvdojuvvo eret, dahje ii olat bohtosiid maid háliidivččii, dadjá son.
– Fidnofágaoahppit eai ge sáhte ávvudit, go olu oahppit šaddet ieža máksit reaidduid ovddas mat adnojit oahpahusas.
– Dálá ráđđehus lea guhká hállan fidnofágaid áŋgiruššama birra, ja ahte háliidit láhčit dili vai eambbosat válljejit dan. Ii sáhte leat seamma ráđđehus mii lea bidjan dán bušeahta, dadjá Schultz.
