-Almmuhus-
KULTUVRAOhcet váhnemiid Sámás Mánáin giellakampánjii

Ohcet váhnemiid Sámás Mánáin giellakampánjii

-

-

Leat go don smávvamáná váhnen, dahje leat go vuordimin unnoračča lagamus áiggi? Dalle soaittát don leat juste dat gean Sámediggi ohcá sin ođđa kampánjii Sámás Mánáin!

– Sámediggi álggaha 2016:s kampánja man mihttu lea fuomášuhttit giellaválljema mánáide. Ulbmil lea oažžut eambbo dieđuid giellaválljema birra, ja čalmmustahttit hástalusaid ja vejolašvuođaid. Danin leat dál ohcamin váhnenolbmuid geat searvvaše kampánjii juohkin dihte vásáhusaid mánáid giellaválljema ektui. Dán dieđiha Sámediggi sin ruovttusiiddus.

 

Ohcet váhnemiid buot giellaguovlluin

Sámediggi bovde kampánjii searvat váhnenolbmuid buot giellaguovlluin ja háliidit oktavuođa váhnemiiguin sihke dakkár báikkiin gos sámegiella lea nanus ja gos giella ii leat nu nanus.

Sámediggi háliida oktavuođa bearrašiiguin geain leat goappaš váhnemat sámegielagat, nubbi váhnen dahje ii goabbáge váhnen sámegielat. Áidna eaktun lea ahte leat válljen dahje árvvoštalat válljet sámegiela mánnái dahje mánáide. Sii geat servet prošektii servet eaktodáhtolažžan.

Sámedikkis lea ovdal leamaš sullasaš kampánja, dan gohčodedje ges «Sámás Muinna!». Dat lei oaivvilduvvon nuoraide ja galggai sin movttiidahttit sámástit.

 

Deaivvadeamit ja bargobájit

Sii geat servet kampánjii bovdejuvvojit deaivvademiide/bargobájiide gos fáddán lea giellaválljen ja gos váhnemat besset deaivvadit eará váhnemiiguin. Váhnemat bovdejuvvojit searvat iešguđetge lágan doaimmaide, nugo semináraide, artihkkaliidda neahttasiidui, filbmabihtážiidda ja nu ain viidásat.

Sámedikki bealis jođiha Liv Karin Klemetsen prošeavtta ja sus sáhttá oažžut eambbo dieđuid kampánjja birra.

-Almmuhus-