Márkomeannu festiválas ožžot boahtte geasi vihtta nuora vejolašvuođa gárvet ja ovdanbuktit iežaset lávlaga Márkomeanus.
Márkomeannu festiválas ožžot boahtte geasi vihtta nuora vejolašvuođa gárvet ja ovdanbuktit iežaset lávlaga Márkomeanus.
Boahtte geasi festiválas galgá Márkomeannu gávdnat nuoraid geain lea musihkkárniehku ja sii galget beassat lávddi alde ovdanbuktit iežaset lávlaga ámmátmusihkkáriid vehkiin ja buvttadeddjiin.
Sáddet demo
Oažžun dihte vejolašvuođa leat mielde Nuoraid Sessionsis, mii lea prošeavtta namma, fertet sáddet oanehis demo Márkomennui. Jury vállje geat besset searvat Nuoraid Sessionsii, ja geat besset čuojahit Márkomeanus.
– Márkomeannu háliida čáhkket saji lávddis nuorra musihkkáriidda geat eai leat vel ásaiduvvon ja geat háliidit ráhkadit ođđa musihka Sápmái. Nuorran ii leat álo álki olahit iežas musihkain. Gáibida ollu barggu, ja leat olusat geain ii leat doarvái áigi bargat musihkain, dadjá festiválajođiheaddji Marita Eilertsen.
(Ášši joatká gova vuolábealde)
Vuollegis lassa
Festiválajođiheaddji Marita Eilertsen deattuha ahte lea hui vuollegis lassa sáddet demo.
– Filbme iežat telefovnnain, bádde jiena dihtoriin, buot sáhttá geavahuvvot, nu guhká go mii beassat gulastit oasi das mii dus lea fállat. Jus leat gaskal 15- ja 25-jahkásaš, ja beroštat musihkas, de mii nu háliidat ahte don sáddet midjiide musihkkabihtáža, lohká Eilertsen.
Áigemearri sáddet demo lea njukčamánu 20. beaivi.
Váldolávddis
Nuorat ja musihkkárat galget deaivvadit guktii ovdal Márkomeanu. Vuosttaš deaivvadeapmi lea 2016 giđa, dalle galget sii álggahit barggu olahit mihtu, mii lea konsearta Márkomeanu váldolávddis. Nuorat deaivvadit fas vahkku ovdal Márkomeanu, goas sii ožžot vejolašvuođa hárjehallat ja gárvet lávlagiid.
– Mun lean ilus go mii oažžut vejolašvuođa veahkehit nuorra čehpiid geat gávdnojit iešguđetge guovlluin, dan bokte ahte addit sidjiide vejolašvuođa gaskkustit iežaset musihka. Dáinna lágiin addit sidjiide buori vuolggasaji joatkit musihkain, muitala Nuoraid Sessions buvttadeaddji, Svein Schultz.
Oahppan musihkkarat
Nuoraid Sessions ámmátmusihkkárat leat Svein Schultz bássačuojaheaddjin, Roger Ludvigsen gitárračuojaheaddjin, Jakop Janssønn rumbočuojaheaddjin, ja Stein Austrud keyboardčuojaheaddjin.
Svein Schultz lea earret eará guhká ovttasbargan Mari Boiniin, ja lea dasa lassin vuoitán Amanda-bálkkašumi buoremus filbmamusihka ovddas, Guovdageainnu stuimmiid filmma musihkain. Roger Ludvigsen lea čuojahan Mari Boiniin badjel 25 jagi. Jakop Janssønn gearggai musihkkaallaskuvlla oahpuin moadde jagi áigi. Son čuojaha earret eará Elle Márjá Eirain, Avantgongiin ja Papirflyin. Stein Austrud čuojaha d’Soundiin, ja lea sihke čuojahan ja leamaš kapeallameašttirin Sámi Grand Prixas máŋga jagi. Son buvttadii maiddái Ann Mari Andersena CD-skearrui «Ándagassii», dieđiha Márkomeannu preassadieđáhusastis.
