Taleantaprográmma jođiheaddji Mona Solbakk muitala ahte stuorámus hástalus lea heivehit oahpu iešguđetge talentii.
– Mii leat dieđusge dál aiddo almmuhan prográmma ja mii fertet dieđusge hui aktiivvalaččat oččodit kandidáhtaid. Dál lea dieđusge earenoamáš hástaleaddji go mii háliidat Mátta- ja Julev-Sámi guovllus sámegielagiid earenoamážit dán prográmmii, muitala Mona Solbakk gii galgá jođihit prográmma.
Son muitala ahte sii eai leat bidjan makkárge ahkemeari, go dat ii leat nu dehálaš sin mielas.
– Don sáhtát leat taleanta ja 29 jagi boaris, ja lea dehálaš ahte mii oažžut buori ohcciid geain mii oaidnit ahte lea potensiála ovdánit ja šaddat boahttevaš mediabargin, muitala Solbakk.
Iešguđetge doaimmat
Solbakk muitala ahte ohcciide sáhttet šaddat iešguđetlágan doaimmat. Dat lea hui dan duohken gii ohcá ja gii beassá prográmmii mielde.
– Mii geahččalit heivehat dan nu bures go sáhttit. Juste dan maid mii oaidnit leat su attáldagat ja taleanta. Dán taleantaprográmma, mii dál lea mis, de leat moattis bargan «Juŋkáin», mii lea min YouTube nuoramus nuoraide, «Valvviin» ja «Urbbiin» bargan. Dat leat iešguđetlágan konseapttain ja prošeavttain, muitala son.
Dat mii dáinna prográmmain lea rievdan ja rahpasan lea ahte sii sáhttet oažžut taleanttaid Troandimii, Bådåddjoi, Romsii ja Kárášjohkii. Kandidáhtat besset dain sajiin bargat áigodagaid dahje stuora oasi dan áigodagas, ja čatnat oktavuođaid ovdamearkka dihtii P3-ođđasiin, dadjá Solbakk.
Nuorat oahpahit organisašuvnna
– Mun nu illudan nuorra olbmuiguin ovdánit fárrolaga. Mii diehtit nuorra olbmot álo buktet áibbas eará geahčastagaid, ja mii oahppat organisašuvnnas seamma olu go sii ohppet mis. Láve leat nu gelddolaš nuorra olbmuiguin bargat ja dasa gal nu illudat, dadjá Solbakk.
Son muitala ahte sávvá ahte vaikko go deattuhit julev- ja máttasámegiellágiid, de háliida ahte davvisámegielat nuorat áddejit ahte sáhttet ohcat.
– Mis leat guhtta saji, nu ahte lea oalle stuorra vejolašvuohta beassat dan prográmmii, dadjá son.
Bargu bistá guhtta mánu čakčamánus dán jagi boahtte jagi geassemánnui.
– Dat mii lea stuorámus hástalus lea go leat válljen dan guhttasa, de lea gávdnat dan geainnu sin váras, mii sidjiide heive buoremusat. Ja nagodit buori čuovvuleami oažžut beroškeahttá gos sii barget ja gos sii leat eanemusat, muitala Solbakk.
Son dadjá ahte sis leat buorit ovttasbargoguoimmit NRK:s, ja sii leat ráhkkaneamen bures váldit daid vuostá nu ahte Solbakk dadjá ahte lea áibbas sihkar ahte dat manná hui bures.
– Dieđus hástaleaddji lea dál dat koronadilli go eat dieđe mo šaddá, ja sávvat ahte mii leat eanet dábálaš dilis čavčča rájes, loahpaha son.
