-Almmuhus-
-Almmuhus-
OĐĐASATOhcet nuoraid geat searvva­še TV-ráidui

Ohcet nuoraid geat searvva­še TV-ráidui

-

-

NRK Sápmi lea dál ozus nuoraid gaskkal 15-18 jagi geat leat fárremin ruovttus eret joatkkaskuvlii álgit. TV- ja neahttaráidduin «Borteboerne» háliida NRK Sápmi čájehit movt nuoraide lea fárret eret ruovttus. 

Dán jagi borgemánus álget báddemat TV- ja neahttaráidui «Borteboerne», ja bistet gitta geassemánu 2021 rádjai. TV- ja neahttaráidui sáhttet sihke sámi nuorat ja eará nuorat geat leat fárremin sámi guovlluide searvat. 

Čuovvut nuoraid árgabeaivvi

TV-ráiddu castinghoavda Ánne Kátjá N. Gaup muitala ahte «Borteboerne» lea dokumentára ráidu, gos sii čuvvot nuoraid geat fárrejit ruovttuin eret, ja geahččit besset oaidnit movt nuorat vásihit fárret eret ruovttuin ja movt sii birgejit. 

– Mii čuovvut moadde nuora ovtta jagi ovddasguvlui, mii boahtit báddet dan beaivvi go fárrejit, vuosttáš skuvlabeaivvi ja dassái go geasseluopmu álgá. Veahážiid mielde báddet ovtta jagi ovddasguvlui, muitala castinghoavda Ánne Kátjá N. Gaup.

Gaup muitala maid ahte ohccis eai dárbbaš leat makkárge TV-vásáhusat ovdalaččas.

– Ohcci sáhttá sihke sámástit ja dárustit, mii ohcat nuoraid miehta Norgga, muitala Gaup.  

Sávvet eambbosiid ohcat

Castinghoavda muitala ahte sii leat ožžon ohcamušaid, muhto sii sávvet ahte eambbosat vel sáddejit ohcamuša. 

– Mis ii leat ohcanáigemearri, muhto árvideames álggus borgemánu leat gergosat álggahit báddema, muitala Gaup ja lasiha: 

– Mis lea dieđihanskovvi min neahttasiiddus, ja mun ávžžuhan buohkaid geain orru veahá miella searvat sáddet ohcamuša e-boastta dahje NRK Sámi neahttasiiddu bokte, ii galgga ballat sáddet ohcamuša. 

Muitá go ieš fárrii vuohččan

Ánne Kátjá muittaša dalle go ieš vuohččan fárrii ruovttus eret. 

– Mun muittán hui bures dalle go ieš fárrejin Guovdageainnus Áltái vázzit joatkkaskuvlla, dat lei veahá issoras, ja juste dainna TV-ráidduin háliidat mii čájehit movt dat lea. 

-Almmuhus-