-Almmuhus-
OĐĐASATOhcet nissonolbmo gii fárre Englándii ovtta vahkkui

Ohcet nissonolbmo gii fárre Englándii ovtta vahkkui

-

-

BBC kanála lea ohcame Skandinávalaš nissonolbmo gii háliida lonuhit eallima eŋgelas nissonolbmuin ja orrut Englánddas birrasii vahku.

– Leat go goassege imaštallan movt livčče eallit áibbas eará eallima, jearrá BBC almmuhusas mainna ohcet nissonolbmo TV-ráidui gii sáhttá lonuhit iežas eallima ovtta vahkkui. Eaktu lea ahte it leat goassege fitnan Englánddas.

Nubbi nissonolmmoš, gii lea Englánddas eret, geahččala eallit ges du eallima dan botta go don leat Englánddas su eallima geahččaleame.

Nissonolbmot geat lonuheaba eallima, eaba dieđe guđe guvlui soai galgaba.

 

Áinnas sámi nissonolmmoš

Nicholas Jacobs gii bargá BBC TV-prográmma ráhkademiin, muitala ožžon ollu beroštumi prográmmii, muhto áinnas háliidit eanet olbmuid dieđihit prográmmii.
– Mii ohcat nissonolbmuid miehtá Skandinavia, ja áinnas livčče somá oažžut oktavuođa sámi nissoniin, lohká Jacobs.
TV-prográmmas galget leat guhtta oasi, ja juohke oasis leat ođđa olbmuid birra geat lonohallet eallima.

 

Ođđa eallinperspektiiva

Ulbmil sáhttá leat oaidnit nuppi olbmo eallinperspektiivva, mainna soaitá iežas jurdagiid maid rievdadit.

– Dan vahkus galggat ovttastallat dan nuppi nissonolbmo olbmáiguin ja bearrašiin, vásihit dan nuppi bargoeallima, ja geahččaladdat nuppi astoáigedoaimmaid ja beroštumiid. Dainna lágiin sáhtát vásihit dan riikka dego báikkálaš olmmoš, ii ge dego turistan. Filbmen bistá sullii 7-10 beaivvi álggus ođđajagimánus, čállá BBC.

 

Maŋemus áigemearri ohcat lea juovlamánu 20. beaivvi ja fertet leat badjel 18 jagi boaris.

-Almmuhus-