-Almmuhus-
OĐĐASATOhcet jođiheaddji ođđa searvái

Ohcet jođiheaddji ođđa searvái

-

-

Go Sápmi Pride vuođđuda ođđa searvvi, de dárbbašit áŋgiris jođiheaddji guhte háliida ovddidit LHBTQ-sámiid áššiid.

Sápmi Pride lágideaddjit vuođđudit ođđa searvvi dán vahkkoloahpa.

Searvi dárbbaša áŋgiris jođiheaddji ja earáid geat háliidit bidjat návccaid ovddidit sámi lesbaid, homofiillaid, bifiillaid, transseksualálaččaid ja queeraid áššiide.

 – Mun in áiggo jođihit ođđa searvvi, ja danin ohcat muhtima gii háliida bidjat searaid dán doibmii, logai Leammuid Lemet Ánde go doalai diehtojuohkima ođđa organisašuvnna birra Facebook njuolggosáddagis ikte eahkedis.

 

Sáhttet searvat Skype bokte

Bearjadaga náitala Leammuid Lemet Ánde Áhkánjárgga gávpogis Nordlánddas.

Sápmi Pride lágideaddjit leat mearridan doallat ođđa searvvi vuođđudančoahkkima beaivvi maŋŋel heajaid go dalle leat olu berošteaddjit čoahkkanan seamma gávpogii.

 – Sii geat eai leat heajain, eai ge sáhte boahtit Áhkánjárgii besset čuovvut vuođđudančoahkkima Skype bokte. Jus háliidat jođihit dán barggu, de fertet áinnas váldit oktavuođa, dajai Leammuid Lemet Ánde geas lea ovddasvástádus lágidit vuođđudančoahkkima.

 

Gabba heaittihuvvon

Mannan Sápmi Pride doaluid oktavuođas álggahuvvui Gabba searvi mii galggai bargat LHBTQ áššiiguin ja lágidit Sápmi Pride, muhto searvi ii leat šat doaimmas.

Ovdal go guokte mánu vásse, de mearridii jođiheaddji loahpat go ferte vuoruhit skuvlabargguid. Dasa lassin galget guokte eará stivraláhttu geassádan.

Danin leat Sápmi Pride lágideaddjit mearridan ásahit ođđa searvvi mii váldá badjelasas ovddasvástádusa.

-Almmuhus-