Márkomeannu háliida addit eaktodáhtolaš bargiide erenoamáš vásáhusa, ja rahppá sierra lávvosaji eaktodáhtolaš bargiide.
Márkomeannu háliida addit eaktodáhtolaš bargiide erenoamáš vásáhusa, ja rahppá sierra lávvosaji eaktodáhtolaš bargiide.
– Sidjiide guđet háliidit oažžut ođđa ustibiid eará áŋgiris eaktodáhtolaš bargiid gaskkas, jáhkkit mii ahte eaktodáhtolaččaid lávvosadji sáhttá leat buorre fálaldat. Lávvosadji lea guovddáš báikkis festiválas, ja lea vejolaš ieš tealttá cegget dahje orrut ovtta min lávuin. Dasa lassin galgá dáppe leat eaktodáhtolaš bargiid sierra lounge, muitala festiválajođiheaddji Marita Kristin Eilertsen.
Somá ja guoibmái
Festiválajođiheaddji muitala ahte galgá leat buorre vásáhus bargat eaktodáhtolažžan, beroškeahttá makkár duogáš olbmos lea.
– Mii geat geavahat ollu iežamet astoáiggis lágidit festivála diehtit man somá ja guoibmái dat lea. Dasa lassin ahte oažžu nuvttá festiválabileahta go bargá unnimusat 10 diimmu, de oažžu ođđa ustibiid, ja buot deháleamos lea dat dovdu man oažžu go lea mielde ráhkadeamen juoga dehálačča, muitala Eilertsen.
Áidnalunddot vejolašvuohta
Márkomeannu dárbbaša sullii 120 eaktodáhtolaš bargi vai sáhttá čađahuvvot, ja doaimmat maidda dárbbaša veahki lea sihke sáhtostallan ja ruskasirren ja bileahttavuovdin. Pia Fløystad, guhte lea okta guovtti eaktodáhtolaš bargiid hoavddain, ávžžuha olbmuid dál addit dieđu ahte sis lea miella bargat.
– Jus háliidat ahte Márkomeannu galgá leat čilgemeahttun buorre festivála, de sávvat mii ahte don árvvoštallat veahkehit. Ráhkadit festivála ii leat unna bargu, ja ollu áŋgiris gieđat ja oaivvit fertejit ovttasbargat vai manná njuovžilit, muitala Fløystad.
Sávvet buohkaid bures boahtima
Fløystad muitala ahte sii ožžot jearaldagaid sis guđet árvvoštallet boahtit veahkkin. Earrát eará jerret soapmásat ahte fertego leat sápmelaš vai sáhttá boahtit.
– Dasa mii vástidat ahte mii sávvat buohkaide bures boahtima festiválii, maiddá eaktodáhtolaš bargin. Jus ii dovdda sámi kultuvrra nu bures, de lea leat eaktodáhtolaš bargin Márkomeanus áidnalunddot vejolašvuohta oahpásnuvvat dainna, loahpaha Pia Fløystad, guhte ávžžuha olbmuid deaddilit iežaset festivála ruovttusiidui ja deavdit eaktodáhtolaš bargi-skovi.
Geassefestivála Evenáššis ja Skániin lágiduvvo suoidnemánu 23.–25. b., čállá Márkomeannu preassadieđáhusas.
