Politiijat leat gažadeame vihtaniid jápmináššis Romssas.
Mánnodaga maŋŋelgaskabeaivvi ožžo Romssa politiijat dieđu ahte lea gávdnon mánávovdna Fagerengas Romssas, ja dieđiheaddji maid vuhtii luottaid mat mannet merrii, čállá NTB. Politiijat gávdne nissonolbmo ja su golbma nieiddaža mearas. Eadni ja boarrásamos nieida jámiiga Romssa Universitehtabuohcceviesus, muhto guokte nuoramusa leigga gaskavahku Riikkahospitálas ain heakkaváras.
NTB čállet ahte politiijat lea dutkame ášši goddináššin, ja mánáid áhčči lea vihtan.
– Mii leat ain árrat dutkamis ja bargat máŋggain hypotesain. Okta lea ahte eadni lea goddán ovtta máná ja dagahan guokte nuoramusa heakkavárálaš dillái, muitalii politiijaadvokáhtta Romssa politiijaguovllu Gøril Lund preassakonferánssas disdaga.
Vihtanat, geat oidne bearraša seamma beaivvi, eai loga vihkon maidege earenoamážiid sis mánnodaga, ja buohkat láhttejedje dábálaččat, NTB dieđuid mielde.
