Politiijat eai jáhke 66- jahkásaš dievddu, gii lea leamaš jávkosis mánnodat iđida rájes Buođggáin, mannan guhkás eret ruovttus.
Politiijat eai jáhke 66- jahkásaš dievddu, gii lea leamaš jávkosis mánnodat iđida rájes Buođggáin, mannan guhkás eret ruovttus.
Buođggáin, Mátta-Várjjagis, ohcet dál 66 jahkásaš dievddu gii ii leat leamaš ruovttustis mánnodat iđida rájes.
Dál diibmu 13.40 almmuhedje politiijat gova ja nama 66-jahkásaččas. Su namma lea Eilif Salangi. Sii čállet preassadieđáhusas ahte son lea 165 cm guhku ja seaggi.
Politiijat čálle iđđesbeaivve Twitteris ahte sihke politiijat, buollinčáskadanveahka, Rukses ruossa, Siviilasuodjalus, Riddofákta ja eaktodáhtolaš olbmot leat ohcame dál dievddu. Dál bivdet fanaseaiggádiid dán gilis Nuorta-Finnmákkus iskat leat go sin fatnasat hápmanis.
Ii mana guhkás
Nuorta-Finnmárkku politiijaid bargoveahkahoavda Bjørn Tormod Syversen muitala Ávvirii ahte sii ohcet dál vuos lagas guovllus, go dievdu ii vánddar guhkás danne go ii leat áibbas dearvvaš.
– Mii ohcat lagas guovllus. Dievdu ii nagot mannat guhkás, go ii leat áibbas dearvvaš. Mii ávžžuhit ge dál olbmuid Buođggáin iskat visttiid ja muđui lagas birrasa, dadjá son.
Moaddelogi olbmo leat ohcame su dál.
Sihkkel ja fanas
Syversen muitala ahte 66-jahkásačča eai jáhke mannan guhkás.
– Son lea guolásteaddji, muhto fanas lea gáttis. Son lávii sihkkelastit maid vehá, muhto sihkkel lea ruovttus. Mobiltelefuvdna lea maid báhcán ruoktot.
Ohcan juo helikopteriin
Dievddu bearaš dat lea dieđihan su jávkan. Mánnodat eahkeda ohce dán dievddu Sea King helikopteriin, muhto helikopter heittii ohcamis diibmu 21.30.
Syversen ii lohkan 12-áigge dál distaga iežaset áigut vel bidjat Sea-King helikoptera fas ohcamii, muhto dan lohká sin árvvoštallat dađi mielde.
