Ohcejoga gielda lágida johka šearrá -kulturvahkku, mii viidu boahtte geasi olles Ohcejoga gildii!
Ohcejoga gielda lágida vuot suoidnemánu 3.–9. beaivvi Utsjoen Lumo – Ohcejohka šearrá – kulturvahku, mii viidu dán háve buot Ohcejoga giliguovddážiidda: Ohcejohkii, Njuorggámii ja Gáregasnjárgii! Kulturvahkus, mii ordnejuvvo dál nuppe háve, sáhttá bargat, oaidnit ja vásihit feara maid!
– Vuordimis leat máŋggalágan dáhpáhusat, mat sisttisdollet earret eará lihkadeami, teáhtera ja eandaliige sámemusihka ja -kultuvrra. Vahku áigge lávddi alde oaidnit earret eará sámeartisttaid Amoc, Ailu Valle, Ánnámáret, Jalvvi Niillas, Yungmiqu, Laura Tapiola ja DJ Sunna Maaret. Ámmátdánsut Birit ja Katja Haarla doallaba dánsunbargobájiid mánáide ja nuoraide, ja Teatteri Tie fállá eallimáidnasiid buotahkásaččaide, muitala Ohcejoga gieldda asttuáiggečálli Kaisa Tapiola-Länsman preassadieđáhusas.
Kulturvahku dáhpáhusat leat buohkaide rahpasat ja nuvttá.
Sáhttá evttohit eará doaimmaid maid
Álgoprográmma gávdno Ohcejoga gieldda neahttasiiddus www.utsjoki.fi. Ohcejoga gieldda searvvit, fitnodagat ja eará doaibmit sáhttet evttohit kulturvahkkui iežaset prográmma 31.5. rádjái gieldda asttuáiggečállái. Lágideaddjit leat Ohcejoga gielda. Ovttasbargoguoimmit leat earret eará Dáidaga ovddidanguovddáš, Sámi Siida ry, Sámedikki musihkkaguovddáš, Utsjoen Kuohu ry, Gáregasnjárgga gilisearvi, Pohjolan Osuuspankki ja báikkálaš fitnodagat ja searvvit dáhpáhusaid ordnejeaddjit.
