-Almmuhus-
OĐĐASATOhcejogas fas gávdnon korona – gidden olles dearvvašvuođaguovddáža

Ohcejogas fas gávdnon korona – gidden olles dearvvašvuođaguovddáža

-

-

Gaskavahku bođii diehtu ahte Ohcejoga gielddas lea gávdnon ovtta olbmos korona. Olmmoš lea dal sirdojuvvon Anára gieldda dearvvašguovddáža seaŋgaossodahkii Avvilii. Dál dieđiha gielddadoavttir Heidi Eriksen ahte nuppis lea vel gávdnon korona. 

Ikte duođaštuvvui koronadávda Ohcejogas, dan čálii gielda iežaset neahttasiidui. Koronabuohcci ledje sádden Avvilii dikšui, dieđihii Anára gielda iežaset neahttasiiddus.  Dál dieđiha Ohcejoga gielddadoavttir Heidi Eriksen ahte vel ovttas lea gávdnon korona.

– Odne lea gávdnon vel okta geas lea koronapositiiva iskkus Ohcejoga dearvvašvuođaguovddáža seangaossodagas. Muhto mii eat dieđe gos dávda lea njommon, dasa ii gávdno vel vástádus, muhto leat guorahallame dan dál, čilge Eriksen. 

Erremii biddjon

Ohcejoga gielddadoavttir Heidi Eriksen čilge ahte sii leat bidjan olbmuid erremii.

– Mii leat bidjan dal buot golbmanuppelot vuorasolbmo geat leat seangaossodagas erremii, čilge son. Maiddái sin geain leat dávdamearkkat leamaš mii leat bidjan erremii, ja sin geain lea leamaš oktavuohta sudnuin geain lea koronadávda dáppe.

Váldán iskosiid

Ohcejoga gielda iská dál goas ja gos koronanjoammun lea boahtán. Muhto gielda ii dieđe gallis sáhttet leamaš njoammunváras. Gielddadoavttir dieđiha ahte dávda sáhttá leat njommon dearvvašvuođabargiide, eará buhcciide geat leat seamma ossodagas ja maiddái buohcci lagasolbmuide,

– Mii dahkat koronaiskosiid buot olbmuin olles ossodagas ja maid buot dearvvašvuođaguovddáža bargiin. Mii leat maiddái leamašan oktavuođas oapmahaččain. Dál justa dát čuohcá ossodaga buhcciide ja divššáriidda ja vejolaččat muhtin ovttaskas olggobeale olbmui, muitala Eriksen.

Vuordit bohtosiid

Gielddadoavttir Heidi Eriksen čilge ahte sii dal vurdet bohtosiid eará iskosiin ovdal go dihtet gos dávda sáhttá njommon. 

– Ja dat leat sii geat leat maid fuolastuvvan go lea oktavuohta leamaš min nuppelot dearvvašvuođabargiin barggus dehe asttuáiggis, muhto mii eat leat vel bidjan ovttage min bargiin erremii. 

Deanus šaddan erremii

Rádjeguovlluin leat olu oktavuođat maiddái Detnui. 

– Mis leat oktavuohta dieđut ja máŋggat olbmot leat leamaš galledeami iežaset lagašolbmuid dáppe dearvvašvuođaguovddážis, muhto min dieđuid mielde eai leat galledan daid olbmuid geain dál lea korona duođaštuvvon, čilge Ohcejoga gielddadoavttir Heidi Eriksen.

Deanus váldet iskosiid

Per Ivar Stranden, Deanu dearvvašvuođaguovddáža doaibmajođiheaddji čilge ahte sii leat váldán iskosiid Deanu dearvvašvuođaguovddážis.

– Mii leat váldán olu iskosiid odne, logenári sullii, ja dat olbmot leat bidjon erremii dassá go čielggadit lea go sis korona vai ii. Dan mii dahkat dán dilis, mii fállat iskosiid váldit dáppe min dearvvašvuođaguovddážis jus olbmuin lea dárbu, čilge son. 

VÁLDET EANET ISKOSIID: Per Ivar Stranden, Deanu dearvvašvuođaguovddáža doaibmajođiheaddji čilge ahte sii váldet eanet koronaiskosiid dal Deanus. Govva: Ávvir arkiiva preassagovva 
VÁLDET EANET ISKOSIID: Per Ivar Stranden, Deanu dearvvašvuođaguovddáža doaibmajođiheaddji čilge ahte sii váldet eanet koronaiskosiid dal Deanus. Govva: Ávvir arkiiva preassagovva 

Háliidan váldit iskosiid

Stranden čilge ahte maŋemus áiggi leat eanet olbmot háliidan váldit iskosa ja ahte sis lea buorre kapasitehta váldit olu iskosiid.

– Mii sáhttit iskat olu olbmuid dáppe jus dat dárbu boahtá, čilge son. Ja manná johtilit dassá go vástádus boahtá, dušše jándora čilge son. 

– Mii eat leat vel ožžon gažaldaga veahkehit Ohcejoga gieldda, muhto mii váldit iskosiid maid Ohcejoga olbmuin geat barget Deanu gielddas čilge son. Mii iskat nai dal mo šaddá dal go Suopma nanne rájádárkkisteami, diehtu mii bođii odne, ja mo dat váikkuha min doaimmaide, dadjá Per Ivar Stranden, Deanu dearvvašvuođaguovddáža doaibmajođiheaddji

Gidden doimmaid

Ohcejoga gielda lea dal bidjan gildosa galledit sin dearvvašvuođaguovddáža gaskaboddosaččat, čilge Eriksen. 

– Mearrádus lea boahtán giddet gaskaboddosaččat buot doaimmaid. Go mis lea leamaš olu bargu dainna korona áššiin de leat šluhtten pasieantta áiggiid. Mii dušše váldit buot telefovnna bakte. Go mii eat hálit ahte olbmot bohtet deike ovdal dilli čielgá ja mii sáhttit fállat dorvvolaš divššu fas, muitala Ohcejoga gielddadoavttir Heidi Eriksen. 

– Maid don dajat ássiide Deanus ja Ohcejoga jus sii leat dál balus? 

– Mis leat ain dat njuolggadusat fámus, doalahit gieđaid buhtisin ja doallat dorvogaskkaid nuppiide. Mis lea suomabealde njálbmesuddjen ávžžuhus almmolaš báikkiin jus ii sáhte dollat dorvogaskkaid nuppiide. Ja maiddái muitit ahte jus leat dávdamearkkat berre váldit iskosa ja dalle ovdal boahtá vástádus manná ieš erremii, čilge son. 

 

  

-Almmuhus-