-Almmuhus-
-Almmuhus-
-Almmuhus-
OĐĐASATOhcejoga goddinášši duopmu gárvána odne

Ohcejoga goddinášši duopmu gárvána odne

-

-

Lappi gearretriekti gieđahallá dál Ohcejoga goddinášši, duopmu válbmana jáhkkimis eahketbeallái.

Váldogieđahallan lea álgán diibmu 9.13 (suoma áiggis) Lappi gearretrievtti Avvila čoahkkinbáikkis. Álggaheapmi maŋŋonii sullii 13 minuhta, daningo bealuštanášševuoddji maŋŋonii čoahkkimis, čállá Yle Sápmi.

 

Olles jirpmiid alde

Lappi gearretriekti gieđahallá ášši mas muhtin 31-jahkásaš almmái lea sivahuvvon leat čuggen jámas 17-jahkásaš gándda Ohcejoga logahagas golggotmánus diibmá. Sihke sivahuvvon almmái ja 17-jahkásaš gánda, guhte jámii, leigga oahppit Ohcejoga logahagas.

Gearretrievttis leat almmuhan mielladilledutkamuša bohtosa, ja dan mielde lei sivahuvvon 31-jahkásaš almmái olles jirpmiid alde dagu dagadettiin.

Gearretduopmár Esko Hohti lohká Yle Sápmái ahte duopmu boahtá otná beaivvi mielde.

 

Sorbmen vai olmmošgoddin

Ášši lei gearretrievttis vuosttaš geardde ovdan njukčamánu álggus. Dalle gearretrievttis addojuvvui nu gohčoduvvon gaskaduopmu, man mielde almmái lei sivalaš heaggarihkkosii.

Gearretriekti váldá loahpalaččat beali maid dáhpáhusa rihkusnamahussii. Alaguoddi lea gáibidan 31-jahkásaš albmái duomu sorbmemis (su. tappo) ja lobihis áitimis. Logahatgándda oapmahaččat goit leat gáibidan sutnje duomu olmmošgoddimis (su. murha), dágu roavisvuođa geažil.

 

Ii lean jiellumis

Niibbástallan dáhpáhuvai golggotmánu 24. beaivvi diibmá, politiijat ožžo dieđu dán birra 12 áigge (suoma áigge) ja válde 31-jahkásaš albmá gitta dakka maŋŋil.

Niibbástallama oktavuođas šadde bolesat evakueret olles skuvlla ohppiid ja maiddái ránnjávisttis sámegielat mánáidgárddi. Čukkohallan 17-jahkásaš lei roasmmehuvvon nu garrasit ahte ii lean jiellumis ja moadde diimmu maŋŋil almmuhedje bolesat ahte gánda lei jápmán.

Sámelogahat mii vásihii dán issoras dáhpáhusa lea ge áidna sámi joatkkaskuvla Suomas. Ohcejoga gilli lea smávva giláš gos orrot badjelaš duhát olbmo. Kárášjogas lea dohko 11 miilla ja Deanus ges čieža miilla.

Ohcejogas lea almmolaš giella sihke Suoma- ja sámegiella, nu ahte ássit leat sáme– ja suomagielagat. Eanaš ássit aŋkke atnet iežaset sápmelažžan, nu ahte Ohcejohka lea čielga sámi gilli Suoma bealde.

-Almmuhus-