Finnmark Rein erenomáš virgealmmuhus oaččui nu olu fuomášumi ahte leat virgádan guokte ođđa bargi. Ii leat dihtosis leat go goappašagain bállut.
Finnmark Rein erenomáš virgealmmuhus oaččui nu olu fuomášumi ahte leat virgádan guokte ođđa bargi. Ii leat dihtosis leat go goappašagain bállut.
Finnmark Rein ozai bargiid geat liikojit snoallamii ja geat girdet sihke baikahája ja vara.
Sii ávžžuhedje nissonolbmuid ohcat geain leat doarvái «bállut» birgehallat bargosajis gos leat eanaš dievdoolbmot.
– Mii leat gávdnan su, muhto ohcat áinnas vel eambbo nissoniid njuovahahkii. Mun lean ieš bargan bargosajis gos leat eanaš dievdoolbmot, ja dieđán ahte lea dárbu nissonolbmuide. Njuovahagas dárbbašat nissoniid go sii leat hui dárkilat ja maiddái vai dássádat sohkabeliid, lohká Finnmark Rein eaiggát ja márkankoordináhtor Anette Buljo.
Guokte ođđa bargi
Ođđa bargit eai sáhte leat hearki. Dábálaččat barget oainnat badjeolbmot Finnmark Rein njuovahagas Vuonnabađas, ja sii gal dihtet bures mo Meny gávppi biergostuhkka lea ráhkaduvvon.
Danin eaktuda bargoaddi ahte bargit eai sáhte heađástuvvat go Rudolf gártá málesruitui ja eai ge sii sáhte moraštit go luođđa bisána miesi gállui.
– Badjeolbmot leat iežaset bargguin dál, danin šattai mis heahti. Go čállen almmuhusa, de fertejin addit rievttes gova bargosajis. Mun čájehan duohtavuođa ja váikkuhus leamaš ahte mis jo leat guokte ođđa bargi. Dasa lassin bohtet vel guovttis ihttin, lohká Buljo ja geažuha ahte dárbbašit vel eanet njuvviid.
Olu leaikkastallan ja varra
Buljo bargá olu márkanfievrridemiid ja vuovdá bierggu buvddas.
Son muitala oallugiid deaivat geat eai oba jurdil ge man láhkai biergu ráhkaduvvo. Dasa lassin leat olu olbmot geat eai oba gierdda ge vara.
– Min bargit fertejit veahá gierdat. Njuovahagas leat 99 proseantta ádját, ja de gal šaddá olu leaikkastallan bargosajis. Go leat olu almmáiolbmot, de šaddá maid olu snoallan ja buorre mokta. Min bargosajis dattege eat dohkket gal ahte dulbmot nissonolbmuid, čilge Anette Buljo.
Olu fuomášupmi
Finnmark Rein eaiggát bidjalii iežas Facebook neahttasiidui virgealmmuhusa.
Dát lea ožžon viehka olu fuomášumi. Sullii 300 olbmo leat liikon virgealmmuhussii ja badjel beannot čuođis leat juohkán dan.
– Lean olahan hui viidát ja dat lei ge ulbmil. Mu mielas lea maid hui buorre go leat ožžon báikkálaččaid bargui. Vaikke min márkan ii leat nu stuoris, de in dieđe ja dovdda buohkaid geain ii leat bargu, lohká Buljo.
Son dadjá olbmuid leamaš hui positiiva erenomáš virgealmmuhussii.
– Oainnán ahte muhtin lea min buohtastahtán Mannegruppa Ottariin, muhto muđui gal leamaš olbmot hui positiiva. Munnje lei dehálaš jođánit almmuhit virggiid ja háhkat bargiid, loahpaha Buljo.
