-Almmuhus-
SMÁVVAOĐĐASATOhcciid­logut njidjet

Ohcciid­logut njidjet

-

-

Oktiibuot 8 115 ohcci leat válljen UiT Norgga árktalaš universitehta bajimussii go leat ohcan alit ohppui. Diimmá ektui njidjet ohcciidlogut ja dát dáhpáhuvvá miehtá Norgga. 

UiT Norgga árktalaš universitehta ohcciidlohku lea njiedjan 17 proseanttain diimmá ektui.

Oktiibuot leat 26 156 olbmo ohcan oahpuide ja dáid searvvis leat 8 115 ohcci bidjan Davvi-Norgga stuorámus oahppobáikki bajimussii. 

– UiT Norgga árktalaš universitehtas leat leamaš erenomáš buorit ohcciidlogut sihke 2020:s ja 2021:s. Dál oaidnit ahte ohcciidlogut njidjet, ja dát dáhpáhuvvá miehtá Norgga. Maŋŋel go servodat- ja bargoeallin fas normaliserejuvvui, de rahpasedje eanet vejolašvuođat nuoraide, lohká UiT oahpahusaid prorektor Kathrine Tveiterås preassadieđáhusas. 

Sámi allaskuvla ja Nord universitet

Sámi allaskuvllas álget golbma oahpu dán čavčča ja doppe plánejit fállat oahpposaji 44 studentii. Oktiibuot leat Sámi allaskuvlii ohcan 57 olbmo, ja dáid searvvis leat 28 ohcci bidjan oahppobáikki bajimussii. Diibmá ledje Sámi allaskuvllas 70 ohcci 54 oahpposadjái. Dalle ledje 31 ohcci válljen oahppobáikki bajimussii. 

Nord universitehta ges álggaha 85 oahpu dán čavčča ja fállá 3 156 oahpposaji. Dáidda leat ožžon 14 778 ohcamuša, 4 521 olbmo leat bidjan Nord universitehta bajimussii ohcanlisttus. Diibmá ledje sis 19 585 ohcci 3 319 oahpposadjái. Dalle ledje 6 038 olbmo bidjan oahppobáikki bajimussii. 

Samordna opptak almmuhii alit oahpuid ohcciidloguid árat dán vahkkus. 

-Almmuhus-