Juovlamánu áigut mii geiget juovlafuomášumi olbmuide geat ánssášit liigefuomášumi barggu ovddas maid dahket illun earáide.
– Mii ohcat olbmuid geat boktet mojiid ja ilu báikkálaš servodagas, juogo bargosajis dahje astoáiggis. Ii dárbbaš leat stuora bargu maid lea doaimmahan, muhto dahkku mii earáide boahtá ávkin ja mii boktá ássanmiela. Sáhttá lohkat ahte mii ohcat árgabeaisáŋgáriid, lohká Ávvira váldodoaimmaheaddji Kari Lisbeth Hermansen.
Soaittát don dovdat dakkár olbmo. Cavgil midjiide gii ánssášivččii juovlafuomášumi.
Čális e-poastta post@avvir.no. Čális oanehaččat manne juste dát olmmoš ánssášivčče juovlafuomášumi.
Sin birra geat ožžot juovlafuomášumi čálistit mii unna áššáža.
