Dievdu dieđihuvvui láhppon árabut dán vahkku. Dál álggahit ohcanakšuvnna Biedjovákki guovllus, gos galgá maŋemuš oidnon.
Dievdu dieđihuvvui láhppon árabut dán vahkku. Dál álggahit ohcanakšuvnna Biedjovákki guovllus, gos galgá maŋemuš oidnon.
Finnmárkku politiijat álggahit ohcanakšuvnna sotnabeaivvi. Politiija, Váldogádjunguovddáš, Suodjalus, Siviilasuodjalus, Rukses Ruossa, Norgga álbmotveahkki, ja Norgga gádjunbeatnagat oassálastet ohcanakšuvdnii.
Láhppon dievddu namma lea Jon-Arne Johansen, son lea 60 jagi boaris, 170 cm allat, guhkki ja seaggi. Sus leat oanehis, čurges vuovttat, ruškes čalmmit ja hupmá Romssa suopmana.
Jáhkket olbmo leahkit Biedjovákkis
Finnmárkku politiijaid operašuvdnajođiheaddji Svein Erik Jacobsen muitala ahte bohtet eanaš ohcat Biedjovákki guovllus, Guovdageainnu suohkanis. Sis leat teoriijat ahte son lea dán guovllus, go galgá ikte oidnon. Muhtun bivdit ledje oaidnán dievddu luoddaguoras, dievdu lei čiehkádan miestaga duohkai.
– Eat dieđe sihkkarit lei go son, muhto láhttema dáfus jáhkkit ahte lea son, lohká Jacobsen.
– Ájahallet su
Dievdu lei tuvrras iežas bearrašiin go gáiddai eret. Jacobsen lohká ahte dievddus ii leat rievttes ipmárdus áiggi ja báikkiid dáfus.
– Son ii soaitte nagodit justte rehkenastit gaskkaid ja man olu biebmu adno, lohká Jacobsen.
Dievdu lea ovdal leamaš sullásaš dilálašvuođas, dalle son gávdnui Ráissas.
Operašuvdnajođiheaddji Svein Erik Jacobsen ávžžuha olbmuid váldit oktavuođa politiijaiguin jus oidnet su, ja geahččalit ájahallat su dassážii politiijat ollejit báikái.
