Politiijat áiggoše oktavuođa olbmáin gii lei vázzime guovllus maŋŋel go helikopter gahčai.
Politiijat rahpet lihkuhisvuođabáikki dábálaš johtolahkii čakčamánnu 5. beaivvi, čállá Álttá leansmánni Øyvind Lorentzen preassadieđáhusas.
– Mii áigut giitit siviilasuodjalusa sin veahki ovddas dan lossa lihkohisvuođabarggus, čállá Lorentzen ja joatká:
– Dál leat identifiseren ovtta sis gii duššai ja oapmahaččat leat ožžon dieđu. Sávvamis geargat identifiserenbargguin vahkku mielde.
Sullii 30 vihtana
Lorentzen čállá maid preassadieđáhusas ahte sullii 30 vihttana leat jearahallon ja ahte sii háliidit ain oktavuođa olbmuiguin geat leat oaidnán maidege.
Sii áiggoše maid oktavuođa olbmáin gii lei vázzime guovllus maŋŋel go helikopter gahčai.
Preassadieđáhusas čuožžu maid ahte lea beare árrat konkluderet maide dán áššis, ja ahte eai dieđe vel mii lei sivvan lihkohisvuhtii.
