Eallilan olmmoš, ON bissovaš foruma eamiálbmotáššiid, Ekonomalaš ja Sosiála Ráđi (ECOSAC) miellahttu, Sher Malik Lion King, lea boahtán USA:s galledit Sámedikki, ohcat doarjaga seailluhit Kalaša eamiálbmoga kultuvrra.
– Ovddastan eaktodáhtolaččat Kalaša eamiálbmoga geat ásset Himalaya alla gáissáin, lohká Sher Malik Lion King, gii ieš ássá USA:s.
Muitala Kalaša álbmot lea dan guovllus ássan dan rájes go boares Makedonia gonagas stuorra Aleksander stuoridii iežas riikka sihke máttás ja nuorttas, jagi 336 ovdal dán áiggi gitta iežas jápmimii.
– Guovllu gos sii ásset gohčodit Hindukush mii lea várreráidu Afghanistanas ja davvin Pakistánas, joatká son ja muitala muslima kránnját leat bággegoahtán Kalaša eamiálbmoga guođđit iežaset árbevirolaš vieruid nu go sin kultuvrii dehálamos dáhpáhusa, giđđafestivála, ja šaddat musliman.
Erenoamážit lea Kalaša eamiálbmoga árbevirolaš giđđafestivála boktán riiddu. Giđđafestiválas čiŋadit sii hearvabiktasiiguin ja dánsot ja juhket viinna ja dán vieru háliidit muslimakránnját bissehit. Buot dat leat dagahan hirbmat riidduid dán guovllus.
