-Almmuhus-
OĐĐASATOff­road Finn­mark 2021: Leif Ante (53) áigu bargat dan maid ii oktage ovdal...

Off­road Finn­mark 2021: Leif Ante (53) áigu bargat dan maid ii oktage ovdal leat nagodan

-

-

Leif Ante Bongo (53) áigu duolbmut 1150 gilomehtera vahkkus, buot golbma gaskka Offroad Finnmark gilvvus. Dan ii leat oktage eará čađahan ovdal. 

Son lea viđa háve ovdal searvan Offroad Finnmark nammasaš duolbmunsihkkelgilvui. Gilvvus leat golbma iešguđet guhku mátkkit; 150 gilomehtera, 300 gilomehtera ja 700 gilomehtera. Leif Ante Bongo lea searvan iešguđet gilvvuide jagis jahkái, 2015 rájes.

Vaikko 2019:s, go duolmmui ja čađahii 700 gilomehtera gilvvu, logai iežas geargan, de leat dál eará plánat. Garra mielain ja jurdagiiguin lea son mearridan geahččalit juoidá man ii oktage ovdal leat nagodan. Jus časká oktii daid gilvvuid, de šattašii sihkkelmátki 1150 gilomehtera guhkki, olles 115 miilla oktiibuot. Bongo áigu duolbmut buot gilvvuid ovtta vahkkus, olles 115 miilla oktiibuot. 

Lei okta olmmoš gii geahččalii duolbmut buot gilvvuid, muhto son botkii gaskamuttus gilvvus, ja nu ii čađahan. Dál háliidan mun hásttuhit iežan ja geahččalit in go son mun nagot, lohká Leif Ante Bongo, gii áigu 1150 gilomehtera duolbmut. 

Duolbmunsihkkel buoridii dearvvašvuođa

Guovdageaidnulaš ja viđamáná áhčči Leif Ante Bongo muitala ahte lei guhká bártidan čilggiin, ja rumaš lei aivve bákčasis. Son ii láven beroštit sihkkelastit ovdal go dearvvašvuođa dihte lei bággu álgit alternatiiva lášmmohallamiin. Go easkka lei álgán sihkkeliin hárjehallat 2015:s, de searvvaiga olbmáin vuosttaš gilvui, Bingesgilvui.

– Moai leimme ovttain olbmáin goappašagat bártidan rupmašiin. Son namuhii sihkkelastima, ja mun de ohcen iežan boares sihkkela. Geahččalin sihkkelastit Álttá guovddážii, ja dat lei nu issoras lossat, muhto somá, lohká Bongo. 

Das rájes go vuosttaš háve lášmmohallagođii sihkkeliin, de lea ollen Offroad Finnmark duolbmunsihkkelgilvui searvat viđa háve, jagiin 2015-2020. Ieš Bongo bogostallá ja lohká ahte jus sus livččii jearran viđa jagi áigi duolbmunsihkkela birra, de ii livčče diehtán vástidit.

– Viđa jagi áigi in livčče gal diehtán, dahje jáhkkit ge ahte mun boahtteáiggis duolbmunsihkkelin hárjehalan, bogostallá Leif Ante Bongo. 

Hárjehallá juohke beaivvi

Go nu guhkes mátkái duolbmunsihkkeliin galgá searvat, de lea dehálaš ráhkkanahttit rupmaša. Leif Ante Bongo lohká son hárjehallá sihkkeliin measta juohke beaivvi, muhto muđui ii loga eallit earenoamáš vuogi mielde. 

– Mun hárjehalan sullii guđa háve vahkkui duolbmunsihkkeliin, vaikko makkár dálki de leš. Jus lea hui buolaš, de sáhtán geavahit iežan sihkkelmašiinna man lean adnongávppis oastán, muhto dan in šatta dávjá. Muđui boran dábálaččat, eai leat makkárge earenoamáš «diettat», lohká Bongo,

Áigu nagodit

Vaikko dat ovddit sihkkelgilvvut ledje lossadat ja váddásat, de ii vuollán Leif Ante Bongo. Son lea mearridan bargat juoidá man ii oktage eará leat nagodan, ja dan áigu garrasit olahit. Su stuorámus ulbmil dainna lea čájehit ahte olmmoš ii dárbbaš ámmátlaš hárjehalli nagodit dakkáriid. Ieš bogostallá ja lohká iežas jallan go dakkár hástalusa áigu mielaeavttus bargat. 

– Mu jođihanfápmu lea dat ahte soaittán vuosttaš gii čađahan buot. Lea maid dehálaš munnje čájehit olbmuide ahte dákkáriid sáhttá nagodit vaikko ii viečča ámmátlaš veahki, vaikko ii bora earenoamáš biepmu ja vaikko ii ane juohkelágaš hárjehallandávviriid.

GARÁŠA: Leif Ante Bongo garášas leat iešguđetlágan sihkkelat, sihke fatbike nammasaš sihkkel, ja eará. Sihkkelmašiidna, mii govas oidno, adno dušše buolašbeivviid. Govva: Sara Risten Susanna Gaup
GARÁŠA: Leif Ante Bongo garášas leat iešguđetlágan sihkkelat, sihke fatbike nammasaš sihkkel, ja eará. Sihkkelmašiidna, mii govas oidno, adno dušše buolašbeivviid. Govva: Sara Risten Susanna Gaup

Stuorámus hástalus

Gilvvus leat golmmalágaš gilvvut, dahje luotta maidda sáhttá searvat. Guovtti gilvui galgá akto searvat, nu daddjon sologilvu. Vuosttaš sologilvu lea 150 gilomehtera guhkki, ja nubbi fas olles 700 gilomehtera guhkki. Dan goalmmát gilvui, mii lea 300 gilomehtera guhkki, galgá olmmái fárus, ja das galgá son vieljain Johan Ante Bongoin sihkkelastit. 

Bongo muitala ahte stuorámus hástalus lea ollet áiggil 700 gilomehtera mátkkis 300 gilomehtera mátkái. 700 gilomehtera gilvvu ferte nagodit 69 diimmus vai beassaba vieljain Johan Ante Bongoin álgit teamgilvui, mii lea 300 gilomehtera.

– 2019:s mun ádjánin 700 gilomehtera gilvvu sihkkelastit 90 diimmu. Lea gáibádus ahte olmmoš ferte 12 diimmu oktiibuot vuoiŋŋastit, muhto dalle mun vuoiŋŋastin 24 diimmu oktiibuot. Dán háve ferten 10 diimmu jođáneappot, in ge sáhte vuoiŋŋastit nu guhká go dalle. 69 diimmus ferten ollet, vai besse joatkit 300 gilomehtera mátkkiin, muitala Leif Ante Bongo. 

-Almmuhus-