Odne gieđáhallá FeFo stivra galgá go FeFo guoddalt Unjárgga-duomu Alimusriektái. Stivrrajođiheaddji gal lea mielas guoddalit duomu.
FeFo direktevra Jan Olli lea ávžžuhan FeFo stivrra guoddalit Unjárgga-duomu Alimusriektái, go oaivvilda ášši fertet alimus dásis čielggaduvvot.
– Dárbbašlaš čielggadit Alimusrievttis
Son cealká FeFo lea árvvoštallan duomu prinsihpalaš beliid ja daid váikkuhusaid Finnmárkui.
Son oaivvilda dehálažžan oažžut prinsihpalaš čielggadeami danne go meahcceduopmostuollu árvvoštallá stáhta disposišuvnnaid eará láhkái go Finnmárkokommišuvdna ja ovdalaš guorahallamat leat čadnon dasa.
Duopmu buvttiha viidáseappot olu váikkuhusaid sámi beroštumiide ja bissovaš ássiid beroštumiide Finnmárkkus muđui.
Ovttaoaivilis direktevrrain
FeFo stivrajođiheaddji ja Finnmárkku fylkkadikki Olgešbellodaga Raymond Robertsen lea ovttaoaivilis FeFo direktevrrain ahte guoddalit Unjárgga-duomu Alimusriektái.
– Dat lea veardiduvvon min advokáhtas ja direktevrras ja mun lean ovttaoaivilis dasa. Duomus leat eavttut maid jáhkán lea buorre čielggadit, go dat boahtá váikkuhit viidáseappot barggu Finnmárkkus. Min advokáhta ja direktevra oaivvildit leat momeanttat duomus mat eai leat čalmmustahtton doarvái bures ja lea dehálaš čielggadit ášši Alimusrievttis, lohká stivrajođiheaddji Robertsen.
Ii beahttal sámi vuoigatvuođaid
FeFo stivralahttu ja sámediggeáirras Árjja ovddas, Hartvik Andreas Hansen, lohká son ii sáhte beahttalit sámi vuoigatvuođaid vuostá dán áššis.
– Mun gal oaivvildan mii eat dárbbaš guoddalit, dat lea sámi vuoigatvuohta ja dat lea maid dat kommišuvdna galgá guorahallat ja dat lea iešalddis sin bargu. Meahcceduopmustuollu lea mearridan ahte sis lea vuoigatvuohta ja mun in sáhte álgit beahttalit sámi vuoigatvuođaid, deattuha stivralahttu Hartvik Andreas Hansen.
Govven: Silje Malene Varsi
