Ruovttusuodjalus (RS), dahje Heimevernet, lágida juovlamánu njealját beaivvi Unifoarbma bargosajis-beaivvi čalmmustahttit mii RS lea ja geat leat mielde RS:s.
Ále hirpmástuva jus du bargoskihpár, ustit dahje kránnjá boahtá bargui gárvodan uniforpmain bearjadaga. Juovlamánu njealját beaivái, Uniforbma bargosaji-beaivái, sáhttet eaktodáhtolaš olbmot čájehit buohkaide ahte sii leat mielde Ruovttusuodjalusas (RS) ja ahte sii leat ožžon lobi geavahit uniforpma barggus.
– Mii doaivut dákkár beaivvi boktit beroštumi ja áŋgirvuođa sihke RS:s ja Suodjalusas. Ruovttusuodjalus háliida ahte leat oidnosis báikkálaččat. Mis leat birrasii 40 000 soalddáha ja befálat miehtá riikka ja mii leat buot virgesurggiin, lohká Ruovttusuodjalusa hoavdda, generálamajor Elisabeth Michelsen preassadieđáhusas.
Dát RS 40 000 soalddáha leat dábálaččat siviila olbmot ja sii leat čađahan vuosttašgeardde bálvalusa Suodjalusas. Jus šaddá roassu dahje soahti, de lea sii geat cogget badjelii uniforpma geat galget leat mielde suodjalit riikka iežaset ruovttubáikkis. Lea dat báikkálaš čanastupmi mii dahká Ruovttusuodjalusa erenoamážin.
