Miessemánu 3. beaivi lea sámi mearkabeaivi. Dálkediida mielde lea nu ahte jus odne lea njáhcu, de šaddá árra giđđa
Jus ruosmmesbeaivásis njázuda, geassu fargga.
Muhto jus galbmá, čoaskimat bistet 40 beaivve.
Ruosmmesbeaivve álgá guottetáigi ja čuonji joavdá. Váldoguottet bistá boares ruosmmesbeaivái (16.5.).
Ruosmmesbeaivi lea ruossabeaivi.
Jámežiid johtaladdanbeaivi
Ruossabeaivin dat gohčoduvvo danne go dán beaivvi gávdnui Golgata ruossa, masa Jesus jámii.
Katolihkalaš girku oahpa mielde ruossabeaivi lea jámežiid johtáladdanbeaivi.
Ruossabeaivve ii oaččo oktage rieibmudit ii ge hállat, amaset jámežat ballát ja ráfehuhttit oppa jagi.
Miessebeaivi
– Jus odne lea njáhcu, de šaddá árra giđđa. Jus lea čoaskkis ja buolaš, de dakkár dálkkit bistet sullii mánnotbáji. Jus galbmá ja cuoŋoda, de šaddá guhkes ja galbma giđđa, čállá Marit Murud Eira girjjis «Jahki Sámis – Luondduolbmo birgen”.
Girjjis namuha maid ahte dát beaivi gohčoduvvo muhtun báikkiin Miessebeaivin, go otnážii goit galgá vuosttaš miessi šaddan.
