-Almmuhus-
OĐĐASATOdne iskka­dišgohtet ohppiid ja oahpa­heddjiid

Odne iskka­dišgohtet ohppiid ja oahpa­heddjiid

Journalista

-

-

Hámmárfeastta suohkan cegge odne koronatealttá skuvlla olgobeallái ja čađahišgohtet ođđa koronaiskosiid.

Hámmárfeastta sátnejođiheaddji Marianne Sivertsen Næss muitalii otná preassačoahkkimis ahte sii odne ceggejit koronatealttá Baksalen skuvlla olgobeallái ja iskkadišgohtet oahpaheddjiid ja ohppiid geain lea leamaš njuolggooktavuohta njommojuvvon nuorra olbmuin. 

– Iskan geavvá maŋŋá skuvlaáiggis, dadjá Næss.

Olles luohkká erremis

Mannan vahkus beakkehii ahte ovtta Baksalen skuvlla oahppái lei njommon covid-19. Olles ovccát luohkká ja vihtta oahpaheaddji šadde erremii.  

Vuossárgga, skábmamánu 2. beaivvi, Hámmárfeastta covid-19 logut leat ná:

Dál lea 19 olbmui njommon covid-19 dávda Hámmárfeasttas. Dain leat logi buohcceviesu bargi ja oktiibuot leat 27 bargi erremis. Ii oktage leat sisačálihuvvon buohccevissui. Suohkanlaččat leat guoktása sisačálihuvvon, geat gullaba eará suohkanii. Guđas leat beassan fas eret.

Errenlohku lea fas lassánan. Das lea skuvla-ášši čilgehussan. 85 olbmo leat dál erremis. Sis leat 53 skuvlaoahppi ja vihtta oahpaheaddji. 

Mannan vahkku

Mannan vahkkoloahpas leat njealji ođđa olbmui njommon covid-19. Buot njeallje dáhpáhusa leat guoskevaččat buohcceviesu njoammumii ja sis lea leamaš njuolggaoktavuohta njommojuvvon olbmuide.

Oktiibuot lea Hámmárfeasttas mannan vahkus guđa olbmui njommon covid-19 dávda. Golggotmanu 15. beaivvi rájes leat 38 olbmui dávda njommon. Mannan vahkus leat oktiibuot iskkaduvvon 334 olbmo. 

-Almmuhus-