-Almmuhus-
KULTUVRAOdne čoahkkanit fas gudnejahttit Inga Juuso rohki

Odne čoahkkanit fas gudnejahttit Inga Juuso rohki

-

-

Jus beassážiid áigge it gártan gullat Inga Juuso muitokonseartta, de lea odne ođđa vejolašvuohta Tromssas.

Inga juuso:

Badjel 40 jagi ovdanbuvttii ja gaskkustii son luđiid, ja lei rámiduvvon leat okta dain ovddemus ja deaŧaleamoš  árbevirolaš juigiin olles Sámis.

 

Son nammaduvvui 1999:s máilmmi áidna bistevaš juoigin barggustis riikkaoassemusihkarin Romssa fylkkasuohkanis, ja iežas ámmáha bokte oidnosin dagai ja gaskkustii son dán erenoamáš juoiganárbevieru guhkás olggobeallai sámi ja davviriikkalaš guovlluid.

 

Su gierdomátkkiin galledii son ollu riikkaid iežas máŋggaid ja iežálágan ovttasbargguin, ja daid maŋimuš jagiid son earret eará musihkalaččat ovttasbarggai bassistain Steinar Raknesain, iežaska Skáidi nammasaš joavkkus.

 

Juuso ovttasbarggu bokte eará musihkkariiguin, lei son máŋgii  nominerejuvvon Spellemannbálkašupmái. 

 

2012:s oaččui son Spellemannbálkašumi 2011 ovddas Rabas luohkás, ovttas Bárut nammasaš joavkkuin.

 

Iŋgá Juuso rohki lea maid nammaduvvon «Dán jagáš Álbmotmusihkarin» Folkelarmjuryis (Álbmotriedjajuryis) ja son oaččui maid Nordlysbálkkašumi.

Sámi beassášfestiválas Guovdageainnus árat dán jagi, lei hui erenoamáš konsearta dannego ovddeš artistabargoustibat ledje lávddi alde ja muittašedje ovtta Sámi stuorámus musihkkariin Iŋgá Juuso, gii jámii borgemánu 23.beaivvi 2014:s.

– Sii geat ledje konsearttas besse vásihit áibbas erenoamážiid, seammás diehtit mii ahte hui ollugiin ii lean vejolašvuohta leat dán erenoamáš konsearttas, čállá Tromssa fylkkasuohkan preassadieđáhusastis.

 

– Máŋggas vuordán

Tromssa Fylkkasuohkan dat oainnat ovttasráđiid Beaivváš Sámi Našunálateáhteriin ja Riddu Riđu festiválain, lágidit dán muitokonseartta ođđasit.

Golggotmánu 5.b. dán jagi livčče Iŋgá Juuso gii barggai juoigin, gaskkusteaddjin ja riikkaoassemusihkarin deavdit 70 jagi.

– Dan oktavuođas háliidat mii dál duođaštit dan maid máŋggas leat vuordán. Mii doallat dál konseartta Romssas skábmamánu 7.b. gos mii gudnejahttit Iŋgá Juuso, čállá fylkkagielda.

 

Buohkat servet fas

Konsearttas mii lágiduvvui mannan beassážiid, oassálaste beakkán sámeartisttat, nugo Mari Boine, Sofia Jannok, Ulla Pirttijärvi, Sara Marielle Gaup Beaska, Anders P. Bongo, Ingor Ántte Áilu Gaup ja Leif Isak E. Nilut.

– Buot artisttat geat ledje mielde Guovdageainnus leat lohkan ahte áigot searvat dása, dan seamma lea dadjan Juuso-rohki ovddeš bargoustit ja Riikaoassemusihkar, Ragnhild Furebotten. Leage gearggus dasa mii šaddá hui erenoamáš sámi eahkedin ja vuolgge mielde musihkalaččat gudnejahttit min ovddeš musihkkara ja bargoustiba Iŋgá Juuso, bovde fylkkagielda.

 

Konsearta lágiduvvo Clarion Hotel Edge:s Tromssas, odne skábmamánu 7. beaivvi, diibmu 20.00.

 

 

-Almmuhus-