Otná rájes lea iešdieđáhus lohkanládje 4,7 milliuvnna olbmui. 3,6 milliuvnna sis ožžot iešdieđáhusa dušše elektrovnnalaččat.
Otná rájes lea iešdieđáhus lohkanládje 4,7 milliuvnna olbmui. 3,6 milliuvnna sis ožžot iešdieđáhusa dušše elektrovnnalaččat.
Elektrovnnalaš iešdieđáhusa lea álkit deavdit, ja dagaha ahte vel eambbosat sáhttet oažžut vearroruđaid jo geassemánus, čállá Vearroetáhta preassadieđáhusastis.
Ále mávsse menddo olu – iskka ahte leat rivttes dieđut
Eatnašiidda lea iešdieđáhus dál nu automatiserejuvvon ahte ii goasge leat leamaš álkit deavdit dan. Seammás lea dehálaš muittuhit ahte olmmoš álot ferte iskat leat go rivttes dieđut iešdieđáhusas.
– Ovdalgihtii devdojuvvon ii mearkkaš ahte lea gárvásit devdojuvvon iešdieđáhus. Iskka ahte leat rivttes ja ollislaš dieđut, vai it gártta menddo olu vearu máksi. Soitet ovdamearkka dihte leat gessosat maidda dus lea riekti, muhto mat eai leat devdon dasa, dadjá vearrodirektevra Hans Christina Holte.
Álkidan dihte iešdieđáhusrievdadeami ja -sáddema de lea Vearroetáhta ráhkadan iešguđetlágan reaidduid ja kalkuláhtoriid.
Skatteetaten.no siiddus gávnnat earret eará geasusbagadusa, mátkkoštanbagadusa ja bagadusa mii lávkkiid mielde veahkeha du deavdit iešdieđáhusa.
Vuosttaš geardde olgoriikkadieđut
Vearroetáhta oažžu badjel 50 milliuvnna dieđu earret eará bargoaddiin, báŋkkuin, mánáidgárddiin ja skuvlaastoáigefalaldagain, vai iešdieđáhus lea nu bures ovdalgihtii devdon go vejolaš. Dán jagi leat iešdieđáhusas maid vuosttaš geardde dieđut olgoriikkas.
Ealáhusdoallit fertejit elektrovnnalaččat deavdit
Lea maid dehálaš muitit ahte ealáhusdoallit eai beasa šat addimis iešdieđáhusa. Dán jagi fertejit buot ealáhusdoallit deavdit iešdieđáhusa elektrovnnalaččat.
– Mii leat ráhkadan ođđa, álkit čovdosa nehttii, mii lea sidjiide geain leat iežaset ealáhusdoaimmat ja geat rapporterejit ieža, dadjá Holte.
Ovttaolbmofitnodagat ja oasusfitnodagat main leat álkes logut, sestet áiggi jus sáhttet geavahit «Næringsrapport skatt», mii buhtada ovcci iešguđetlágan skovi ealáhusdolliide. Ealáhusrapporta galgá sáddejuvvot iešdieđáhusa fárus.