Festivála lea dán jagi sirdán Kárášjoga márkanbáikái.
Festivála álggahuvvo bearjadaga nuvttá mánáid- ja nuoraidkonsearttain ja vahkkoloahpa mielde galget máŋga dovddus sámi artistta čuojahit Kárášjoga márkanbáikkis.
Dán jagi lea logi jagi áigi go Beskán Luossa Rock vuohččan lágiduvvui. Festivála lea ovdal lágiduvvon Bieskkenjárggas, muhto dán jagi leat lágideaddjit sirdán festivála Kárášjoga márkanbáikái, slalomluohká vuolábeallái.
Sivvan sirdimii lea earret eará go luossabivdu, mii lei festivála vuolggasadji, lea leamaš giddejuvvon Deanučázádagas maŋemus golbma jagi iige leat diehtu goas fas rahppo.
Dovddus artisttat
Dán jagi festiválas čuojahit earret eará Sančuari, Bernt Mikkel Haglund ja juoigit ja Beyond Rivers. Árbevirolaš juoigit leat Johan Anders Bær, Máhtte Nillas ja Inger Márjá Eira.
Sámediggebušeahtas 2024 lasihii Sámediggi ruhtadoarjaga Beskán Luossa Rockii. Dán jagi lea festivála ožžon oktiibuot 350 000 ruvnno lágideapmái, ja festivála obbalaš bušeahtta leage gaskal 350 000 ja 400 000 ruvnno.
