-Almmuhus-
-Almmuhus-
OĐĐASATOdne álgá árktalaš eamiálbmogiid oahpahuskonferánsa

Odne álgá árktalaš eamiálbmogiid oahpahuskonferánsa

Journalista

-

-

Odne álgá njealjebeaivásaš «Arctic Indigenous Education Conference» , AIEC2016, Árktalaš eamiálbmogiid oahpahuskonferánsa, Guovdageainnus. Lágideaddjit leat Sámediggi ja Sámi allaskuvla ja ulbmil konferánssain lea juogadit vásáhusaid eamiálbmogiid gaskkas oahppo- ja dutkansuorggis.

Konferánssas leat fáttát, nu go earret eará gielaid ealáskahttin, teknologiija váldit atnui oahpaheamis, ja movt dutkan berre čađahuvvot álgoálbmogiid gaskkas.

Sámedikki seniorráđđeaddi Katri Somby muitala konferánssas galgá vuolláičállot Ruonáeatnama, Manitobaa, Northwest territories, Nunavut, Kanada ja Norgga Sámedikki šiehtadus.

– Sii galget čállit vuollái šiehtadusa ahte sii sihkkarastet ain kontinuitehta dáin konferánssain nu ahte dat jámma lágiduvvojit. Dákkár konferánssat leat lágiduvvon 70-logu rájes, ja dáinna šiehtadusain mii formaliseret ovttasbarggu ja galgá juohke goalmmát jagi lágiduvvot, muitala son.

 

Oahpahus dehálaš suorgi

Sámediggi vuoruha garrasit bidjat návccaid dán konferánsii ja háliidat juogadit bohtosiid ja ovdamearkkaid, identifiseret čuolmmaid ja hástalusaid, ja ovddidit ođđa perspektiivvaid árktalaš eamiálbmogiid oahpahusa olis. Somby lohká lea dehálaš čatnat oktavuođaid dásis gos mis lea veaháš iešmearrideapmi, namalassii oahpahusas.

– Oahpahus lea dehálaš suorgi go das hábmet min mánáid boahtteáiggi. Das lea maid sáhka dutkamis mas oažžut dieđuid, ja min mielas lea buorre šiehtadus mii guhkit áigge lea buorrin Sámi servvodahkii ja min oappáide ja vieljaide eará álgoálbmogiid gaskkas, lohká Somby.

 

Stuora beroštupmi

Konferánsii bohtet logaldallit iešguđet fáttás, earret eará dovddus eamiálbmotdutki ja maori Linda Tuhiwai Smith. Somby muitala konferánsii lea hui stuora beroštupmi ja leat dieđihuvvon 243 olbmo.

– Logaldallamat leat rabas dušše ovdagihtii dieđihuvvon olbmuide, muhto buot logaldallamat streamejuvvojit neahta bokte. Muđui lea Diehtosiiddas nu go duodječájáhus man olbmot sáhttet fitnat geahččame, muitala Somby.

 

 

 

 

 

 

 

-Almmuhus-