Ovddit idja lei hui jaskat Finnmárkku politiijaguovllus. Mannán idja ii lean, lei olu feastariedja, ja politiijain lei olu bargu.
Nuorta-Finnmárkku politiijat dieđihit twitteris ahte politiijain lei olu bargu mannán ija. Sii čállet ahte lei olu riedja, gárren vuolleahkásaččat, ja muđui oallugat festemiin. Erenoamážit Čáhcesullos ja Girkonjárggas.
Girkonjárggas ja Čáhcesullos olu bargu
Muhtin olgobáikkis Girkonjárggas, šadde politiijat gohččut ovtta dievddu mannát eret báikkis, go rigerii vávttaiguin.
Okta nisu lei ges Pub1 nammasaš olgobáikkis, son maid rigerii vávttaiguin. Politiijat válde su mielde politiijastašuvdnii arrestii, go lei badjelmeari gárremiin.
Girkonjárgga politiijat registrerejedje maid olu vuolleahkásaččaid mat ledje garremiin. Politiijat šadde bissehit ovtta feasta, gos ledje olu nuorat. Sii ledje ožžon cavgilemiid vuorjašuvvan rávisolbmuin.
Čáhcesullos, Bajasso olgobáikki olggobealde, ledje máŋggat doarrumat. Vuosttaš doarrumis dolvo politiijat ovtta olbmo arrestii go lei badjelmeari gárremiin. Go nubbi doarrun dáhpáhuvai, de eai astan politiijat ovttatmanos vuolgit dohko. Go sii ollejedje dohko, de eai lean šat doarrumiin.
Čáhcesullos dolvo vel ovtta dievddu arrestii, go ii lean jeagadan politiijaid gohččuma guođđit báikki.
Rakeahtta bullehan juolvačiŋaid
Gilevuonas lei heahterakeahtta bullehan juovlačiŋaid, go lei soapmása viesu lahka seivon. Viessoeaiggát ollii čáskadit dola ovdal bearehaga buollái. Dan dieđiha Nuorta-Finnmárkku politiijaguovlu twitteris.
Lávvonjárggas, Mátta-Várjjagis lei priváhta feasta, gosa soames lei viggan sisa. Go feastadoallit eai háliidan su dohko, de lei cuvken olgouvssas láse. Viessoeaiggát ii áigon vel váidit ášši.
Guovttis vel válduiga gitta go politiijat balahit sudno vuodján gárrenvuođas. Okta nisu Báhcavuonas, ja okta nuorra dievdu Girkonjárggas. Politiijat váide goappaš dáhpáhusain.
Olu gárrenvuoddjit
Oarje-Finnmárkku politiijain ii lean lihka olu bargu go Nuorta-Finnmárkkus. Álttás fertejedje politiijat bissehit ovtta feastta, go ránnját ledje váidán politiijaide.
Maiddai Oarje-Finnmárkkus ledje máŋggas vuoddján biillain, vaikko ledje gárremiin. Okta viđalot-jahkásaš nisu Hammerfeastas lei vuodján doaresbeallai biillain. Son mieđihii vuodján gárrenvuođas. Politiijat váide ášši.
Golmmatlot-jahkásaš dievdu Álttás maid váidui go politiijat navde su vuodján gárrenvuođas. Ieš čilgii ahte lei álgán juhkat maŋŋil go lei vuodján.
Seamma čilgehus lei viđalot-jahkásaš dievddus Leavnnjas, gean politiijat maid navde vuodján gárrenvuođas. Politiijat váide ášši.
