Norgga Lágat leat almmuhuvvon ođđa veršuvnnas. Stuorradiggi lea dál vuosttaš geardde beassan almmuhit dan árbevirolaš láhkagirjji.
– Lea stuorradiggi mii dohkkeha lágaid. Dat lea fiinna cealkin demokratiijii go Stuorradiggi fuolaha ahte Norgga guoskevaš lágat gávdnojit ovtta girjjis, dadjá stuorradiggepresideanta Tone Wilhelmsen Trøen preassadieđáhusas.
Láhkačoakkáldagas lea Vuođđoláhka ja guoskevaš lágat mat leat dohkkehuvvon Stuorradikkis ja dáhkiduvvon Gonagasas loahpas jagi 2020:s.
– Lea oalle erenoamáš ahte mis Norggas lea čoakkáldat buot guoskevaš lágaide. Dán háliida Stuorradiggi joatkašuvvat, dadjá stuorradiggepresideanta preassadieđáhusas.
1931 rájes lea Láhkačoakkáldatfoanda Juridihkalaš fakulteahta Oslos almmuhan Norgga lágaid. Dan dihte go ii šat gánnihan, de mearridii Láhkačoakkáldatfoanda ahte 2018-almmuhus galggai leat maŋimuš. Miessemánus 2019:s mearridii Stuorradikki presideantagoddi ahte Stuorradiggi galgá joatkit almmuheaddjin, ja geatnegahttet ruhtadeami. Láhkačoakkáldat boahtá ođđa almmuhusas juohke nuppi jagi.
