Finnmárkku ja Romssa fylkagielda fállá dál oahppofálaldagaid sidjiide geat leat barggu haga ja eai leat gárven joatkkaskuvlla.
Fylka oažžu dál ruđaid, vai besset fállat kurssaid maiguin galgá leat vejolaš gárvet álggahuvvon joatkkaskuvllaoahpu.
– Mii kártet ulbmiljoavkku dárbbuid Romssas ja Finnmárkkus, vai sáhttit plánet oahppofálaldagaid čađaheami, lohká oahppofylkkaráđđi, Bjarne Rohde.
Son lohká fálaldagaid earret eará sáhttit leat skuvlafálaldat oasse- dahje ollesáiggis, neahttaoahpahus, intensiivaoahpahus dahje eksámenkursa. Ii leat ahkemearri fálaldagaide, muhto lea sin váste geat juo ovdalaččas leat lohkan fágaid joatkkaskuvllas, muhto eai leat ožžon studeren- dahje fidnogelbbolašvuođa.
– Váldet oktavuođa
Rohde bivdá guoskevaš kandidáhtaid váldit oktavuođa fylkkasuohkaniin.
– Sávvat ahte sidjiide geaidda dát sáhttá guoskat, geavahit gulahallanskovi vai oažžut dieđu dasa ahte makkár dárbbut olbmuin leat. Nu jođánit go dan gávnnahat, de sáhttit láhčit fálaldagaid ja bidjat johtui daid, lohká fylkkaráđđi.
– Sávvat bidjat johtui nu jođánit go vejolaš čakčat, lohká Rohde.
