Odne doaibmagođii ođđa láhka mii galgá eastadit olbmuid badjelmeare vealggáiduvvamis, dál buoredit vealgeárvvoštallamiid.
Odne doaibmagođii ođđa láhka mii galgá eastadit olbmuid badjelmeare vealggáiduvvamis, dál buoredit vealgeárvvoštallamiid.
Skábmamánu 1. beaivvi doaibmagođii ođđa vealgediehtojuohkinláhka.
Dat mielddisbuktá ahte priváhta aktevrrat ožžot vejolašvuođa ásahit vealgediehtojuohkinfitnodagaid, ja báŋkkut ja lonisteaddjit besset iskat man olu kredihtta- ja golahanvealggit geavaheaddjis leat.
Dát dagaha ahte báŋkkut ja eará lonisteaddjit ožžot buoret vealgeárvvoštallamiid, eai ge atte olbmuide nu stuora loanaid ahte eai nagot dat lotnut.
– Dál lea hirbmat álki oažžut golahan- ja kredihttaloanaid, ii dušše ovtta lonisteaddjis, muhto máŋgasis. Dat dáhpáhuvvá danin go lonisteaddjit eai dieđe man olu geavaheaddjivealgi kundaris lea go ohcá ođđa loana. Olbmuid stuora kredihttavealggit vuorjašuhttet min. Erenomáš olu nuorat gártet velggiide go váldet loanaid badjeloivviid. Dál ožžot viimmat báŋkkut ja eará lonisteaddjit vejolašvuođa čađahit vealgeárvvoštallamiid mat čájehit duohtavuođa loguid, dadjá geavaheaddjeministtar Solveig Horne.
Divrras servodahkii
Olbmuid vealggit lassánit sakka. Ruhtadanbearráigeahču logut čájehit ahte norgalaččaid golahan- ja kredihttavealggit leat birrasii 100 miljárdda ruvnnu, vealggit leat lassánan 17 proseanttain maŋimuš jagi. Erenomáš olu nuorat bártidit golahanloanaid geažil.
Badjelmeare olu vealgi čuohcá olbmo ekonomiijai, bearašeallimii ja dearvvašvuhtii. Ođđa vealgediehtojuohkinláhka lea ráđđehusa doaibma eastadit ekonomalaš váttisvuođaid.
Almmolašvuohta geavaha stuora ruhtasupmiid veahkehit olbmuid geat vealggáiduvvet, Norggas geavahit jahkásaččat 120 miljovnna ruvnnu vealgeortnegiidda.
Dasa lassin masset ruhtadaninstitušuvnnat jahkásaččat masá miljárdda ruvnnu vealgeortnetáššiid geažil. Loahpa loahpas leat dábálaš olbmot geat šaddet dáid lotnut alla reanttuid bokte, čállá ráđđehus iežaset neahttasiidduin.
