Maŋemuš áiggiid leat lassánan rohcošanáššit. Ođđa TV-ráidu galggašii oažžut eanet mánáid muitalit rohcošemiid birra.
Maŋemuš áiggiid leat lassánan rohcošanáššit. Ođđa TV-ráidu galggašii oažžut eanet mánáid muitalit rohcošemiid birra.
Rohcošanáššit mánáid vuostá lassánedje 47 proseanttain 2015 rájes 2016 rádjái, loguid mielde maid NRK lea ožžon Politiijadirektoráhtas.
Leat seksualálaš loavkašuhtti áššit mánáid vuostá mat leat eanemus lassánan. Dasa gullet neahttarohcošeamit, go mánát bággehallet dahkat seksuála daguid alcceseŧ ja earáide webkamera ovddabeale.
2015 ledje 1084 dakkár ášši. 2016 ledje fas 2151. Politiijadirektoráhta dieđuid mielde leat dássážii dieđihuvvon 1394 ášši dán jagi.
Ođđa tv-ráidu mánáide
Bivrost Film, Redd Barna ja NRK Super leat ráhkadan ođđa TV-ráiddu mánáide mas fáddán leat rohcošeamit, rumaš, rájit ja rievttit.
«Kroppen min eier jeg» lea ráiddu namma, njuolga jorgaluvvon sámegillii «ieš eaiggádušan iežan rupmaša». Ráidu lea njealji oasis, ja sáddejuvvo dán vahkku NRK Superis. Leat fáddábeaivvit seksuála rohcošemiid birra.
– Mihttun ráidduin lea oahpahit mánáid rupmaša, seksualitehta ja rájiid birra, vai ieža ipmirdit jus rohcošeamit dáhpáhuvvet, lohká rešissevra Marianne Müller Bivrost Filmas.
– Lea dehálaš ahte mánát besset oahppat fáttá birra, vai sii geat vásihit rohcošemiid máhttet muitalit dan birra, lohká rešissevra Trond Jacobsen.
Dehálaš hupmat
Bivrost Film ja Redd Barna leat ilus go NRK Super sádde filmmaid, vai olu mánát oidnet daid. Ekstrastiftelsen, Bufdir, Mánáid-, nuoraid-, ja bearašdirektoráhtta ja Viken Filbmaguovddáš leat ruhtadan ráiddu.
– Jus mánáiguin hupmá seksuála rohcošemiid birra, de šaddá mánná oadjebassan das ahte sáhttá muitalit čiegusvuođaid birra, ja ahte lea dehálaš ja riekta. Dát máhttu addá maid mánáide ipmárdusa iežaset ja earáid rájiid birra, lohká Hildri Gulliksen. ©NTB
