Romssa ja Finnmárkku Stáhtahálddašeaddji dieđiha ahte tienasrádjá oažžut friija dahje nuvttá riekteveahki, lea lasihuvvon. Eaŋkilolbmot geat tinejit vuollel 320 000 kruvnna ja náittospárat ja elošteaddjit geat tinejit oktiibuot 490 000 kruvnna.
Tienasrádjá oažžut friija dahje nuvttá riekteveahki lea lasihuvvon. Muhtin áššiin sáhtát oažžut ruđalaš doarjaga juridihkalaš bagadallamii dahje doarjaga vuojihit diggeášši duopmustuoluin, čállá Romssa ja Finnmárkku Stáhtahálddašeaddji preassadieđáhusas.
Gáibádus oažžut friija riekteveahki lea ahte tienas lea vuollel riekteveahkkelága tienasrájá.
Ođđajagemánus rievdaduvvo tienasrádjá. Eaŋkilolbmuid tienasrádjá lea 320 000 kruvnna. Náittospáraid ja elošteaddjiid (ovttasássiid) tienasrádjá lea 490 000 kruvnna. Muhtin áššediliin sáhttá oažžut friija riekteveahki beroškeahttá man olu tine ja man olu dus lea opmodat.
Maiddái advokáhta máksu loktejuvvo
Seammás go tienasrádjá loktejuvvo, de loktejuvvo maid almmolaš advokáhta máksu 1085 kruvnnas 1121 kruvdnii 2022 ođđajagemánu vuosttaš beaivvi rájes. Jus dárbbašat veahki, gulaskutta stáhtahálddašeaddjiin dahje advokáhtain.
