Stáhta geaidnodoaimmahat áigu váldit atnui ođđa teknologiija mii dieđiha lea go vejolaš vuodjit badjel vári dálkin.
Prošeavttain áigot geahččalit dán teknologiija 23 dálkeguovllus miehtá riika. Prošeavtta leat gohčodan «Forutsigbart fremkommelige fjelloverganger».
Stáhta geaidnodoaimmahat bovde gulaskuddamiidda, mas áigot kártet makkár doaimmat gávdnojit juo dán suorggis man leat plánen, leago oastinveara ja maiddái maid geaidnoeaiggát ferte láhčit dán oktavuođas.
Dán oktavuođas bovdejit ge sii buvttadeaddji konferánsii, Radisson Blu Airport Hotel Gardermoenii, čákčamánu 13. beaivvi.
Dát lea vuosttaš geardde dákkár konferánssa lágiduvvo.
Bidjet searaid prošektii
– Prošeakta bistá 5 jagi (2022-26) ja dat ii leat okta pilohtaprošeakta, mii bidjat searaid dasa ja čuovvut movt dat doaibmá ja dan ovdáneami das. Mii háliidat earret eará oastit eambbo šearbmašilttaid, dálkestašuvnnaid, iešguđetge sensoriid ja eará rusttegiid, muitala Stáhta geaidnodoaimmahaga prošeaktajođiheaddji, Petter Storødegård.
Dát leat rusttegat maid sii dál geavahit dálvviáigge. Sis leat buorit vásáhusat geavahit dan ođđa teknologiija ja dáinna sii háliidit joatkit. Sii háliidit geahčadit gávdno go vel eará teknologiija man sáhttá geavahit ođđa vuogi mielde ja áiggoše viidásit hutkat ođđa teknologiija mii čájeha siivvu duottarváriin. Sii dieđihit dat boahtá sihkkarastit ja addit buoret dieđu johtolahkii dálvet, mii maiddái sáhttá dagahit ahte sáhttet rahpat geainnuid árat go dan maid ovdal leat sáhttán dahkat.
