Máŋgačuođi ođđa stáhtaboargára geat bohtet miehtá máilmmi galget dál ávvuduvvot. Vuosttaš stáhtaboargármeanut lágiduvvojedje Romssas golggotmánu 23. beaivvi. Dán čavčča lágiduvvojit sullasaš meanut olu báikkiin Romssas ja Finnmárkkus.
Vuosttaš stáhtaboargármeanut lágiduvvojedje Romssas golggotmánu 23. beaivvi. Ávvudedje doppe ahte badjel 150 olbmo 40 riikkas ledje válljen Norgga iežaset ođđa ruovtturiikan. Golggotmánu 30. beaivvi lágiduvvo sullasaš stáhtaboargármeannu Finnsnes báikkis Sáččá gielddas ja Hársttáin maŋit beaivvi, čállá Romssa ja Finnmárkku stáhtahálddašeaddji preassadieđáhusas.
Dasa lassin plánejuvvo lágidit sullasaš stáhtaboargármeanuid Omasvuonas, Álttás, Hámmerfeasttas, Čáhcesullos ja Kirkonjárggas. Áigi ii leat vuos mearriduvvon, muhto lea máŋgačuođi ođđa stáhtaboargára geat ožžot bovdejumi dákkár meanuide.
Guosselisttu mielde lea bovden Romssa meanuide 558 olbmo, 119 olbmo Finnsnesii kulturvissui ja 223 olbmo Hársttáid kulturvissui. Romssas lágiduvvojit meanut Raddison Blue hoteallas tiibmu 10-17 rádjái. Romssa ja Finnmárkku stáhtahálddašeaddji Elisabeth Vik Aspaker boahtá Romssa meanuide.
