Njeallje ođđa ofelačča leat válljejuvvon, ja almmuheapmi lea Márkomeannu doaluin Oslos, suoidnemánu 24. beaivvi.
Sámi ofelaččat Aina Nordfjell, Inga Solberg Åhren, Håkon Mudenia og Maila Risten Bongo Dikkanen leat dál geargan ofelastime ja almmuhit geat skuvlajagis 2020/2021 galget sápmelaččaid birra oahpahit Norgga nuoraide.
– Lean giitevaš ofelašjagi ovddas. Lean beassan vásihit ja oahppat olu. Dát giđđa šattai veahá erenomáš go buot min mátkkit šluhttejuvvojedje koronanjoammuma dihte. Muhto mii leat doallan logaldallamiid neahta bokte skuvllaide. Ofelašjahki lea eambbo go dušše mátkkošteapmi, dadjá ofelaš 2019/2020 Maila Risten Bongo Dikkanen.
Almmuhuvvojit Oslos
Ofelaččat almmuhuvvojit SALT Art&Music Oslos. Márkomeannu lágida konsearttaid gosa besset 200 geahčči, go festivála Gállogiettis šluhttejuvvui njoammudávdda dihte.
Sámi allaskuvlla rektor, Laila Susanne Vars ja stádačálli Máhttodepartemeanttas oassálastiba almmuheamis.
Maŋŋel almmuheamit láidestit dálá ofelaččat bearjadaga konseartaeahkeda gos Marja Mortensson, Kajsa Balto ja DJ iDJa & Åvla čuojahit. Lávvordaga ges láidestit ođđa ofelaččat konseartaeahkeda. Dalle čuojaha KEiiNO ja DJ Niilas.
– Mii galgat ođđa ofelaččaiguin leat fárrolaga Oslos beivviid ovdal almmuheami. Láidestanbargu šaddá sin vuosttaš bargu ofelažžan, nu lei min ge Márkomeanus diibmá. Mii leat olu ovdanbuktán dán jagi nu ahte mii áigut veahá rávvet ja veahkehit ođđa ofelaččaid, dadjá ofelaš 2019/2020 Håkon Mudenia.
Mátkkoštit miehtá Norgga
Sámi allaskuvla doaimmaha Sámi ofelašdoaimma ja Gieldda- ja ođasmahttindepartemeanta (KMD) ruhtada doaimma. Ofelašdoaibma álggahuvvui jagis 2004. Ofelaččat lohket “Sámi kultuvra- ja servodatmáhtu” Sámi allaskuvllas Guovdageainnus. Dasto mátkkoštit miehtá Norgga ja galledit skuvllaid ja eará báikkiid gos leat nuorat ja muitalit sámi kultuvrra ja servodaga birra.
