-Almmuhus-
MÁNÁT JA NUORATOđđa sáme­giel mobiila­speallu mánáide

Ođđa sáme­giel mobiila­speallu mánáide

Journalista

-

-

Gávpotfearán nammasaš mobiilaspeallu gávdno golmma sámegillii ja sáhttá viežžat AppStore ja Google Play gávppiin.

Ohcejoga gielda čállá preassadieđáhusas ahte Ohcejoga gieldda ja Sámedikki oktasaš sámegielaid gáiddusoahpahusa pilohtaprošeakta lea almmuhan ođđa sámegielat mobiilaspealu mánáide. Spealu namma lea Gávpotfearán ja gávdno davvi-, anáraš- ja nuortalašsámegillii.

Speallu lea oaivvilduvvon 6-8 jahkásaččaide ja lea giellalávgunspeallu. Spealus beassá spealli iešguđetlágan fearániid bokte oahppat gávpot- ja dovdosániid iešguđet gávpotbirrasis, iige dárbbaš máhttit lohkat dahje čállit.

Oahppan astoáiggis

Mobiilaspealu ulbmil lea doarjut sámegiel geavaheami ja mánáid oahppama astoáiggis. Spealu leat plánen gáiddusoahpahusprošeavtta bargit ja oahpaheaddjit. Davvisámegiela oahpaheaddji Satu Pieski lea duđavaš loahppabohtosiin.

– Spealu gávpotbirrasat hohkahit mielde, ja spealli oahppá árgabeaisániid mat láktasit iešguđet birrasiidda. Mađi eanet spealli oahppá sániid, dađi guhkkelebbui ovdána spealus, dadjá Pieski preassadieđáhusas.

Vásihit lihkostuvvama

Prošeaktahoavda Hanna Helander sávvá ahte nu oallugat go vejolaš luđejit spealu mánáideaset, daningo dálá áigge mánát ohppet giela álkimusat spealuid bokte.

– Min mihttomearri lea leamašan dat ahte spealli vásiha lihkostuvvama ja oahppá giela iešalddes, dadjá Helander preassadieđáhusas.

Gávpotfearán spealu sáhttá viežžat Google Play ja AppStore gávppiin. Spealu davvisámegielat jietnan lea Juulienna Näkkäläjärvi, anárašgielat fas Satu Aikio ja nuortalašgielat lea Sisko Hilkka Fofonoff. Speallu lea ráhkaduvvon oululaš LudoCraft Oy fitnodagas.

-Almmuhus-