Dán jagi njealját Š-bláđđi lea dál almmuhuvvon, dieđiha Iđut lágádus.
Dán jagi maŋimuš Š-bláđis sáhttá lohkat unjárgalačča Silje Karine Muotka birra, gii dál ássá Álttás. 2021 golggotmánus válljejuvvui son ođđa sámediggepresideantan. Dál beasat gullat makkár presideanta lei nuorran, ja makkár ráva sus lea Kylie Jennerii.
Š-bláđi olggoža čiŋaha Nora-Cathrin Duorra Sparrok (21) gii šattai eatnin nieiddažii dán jagi. Nora-Cathrin lea dearvvašvuođafágabargi ja muitala mainna son niegada bargat boahtteáiggis. Daniel Mortensson lea su máttar-máttaráddjá, gii lei Waren Sardne-áviissa ásaheaddji ja doaimmaheaddji.
Takakehto Charles (25) gullá guovtti álgoálbmogii. Sus lea gullevašvuohta Áđevuopmái ja Kanadai. Son lea neavttár ja lea leamašan turneas gos lea neaktán Sojiiguin-čajálmasas.
Sara Katrine Aleksandersen (20) lea sámediggeáirras, boazodoalli ja fitnodateaiggát. Son lea álggahan Ž design-fitnodaga, mainna sáhttá sámegiela oažžut eambbo oidnosii.
Nuoraidmagasiinna divššár Ánne-Hedvig vástida ges gažaldagaide.
Muđui
Iŋgá Káre Márjá Utsi lea nuoraidmagasiinna doaimmaheaddji. Š almmuhuvvo 4 geardde jahkái. Š-bláđđi lea sáddejuvvon 1.332 nuoraide sin skuvlla bokte, oktiibuot 75 skuvlla. Š sáddejuvvo nuvttá skuvlanuoraide Norggas geain lea sámegiella fágan oahpahusas. Iđut-lágádus almmuha dán jagáš njealját Š-bláđi. Boahtte Š almmuhuvvo guovvamánus 2022. Sámediggi ruhtada magasiinna almmuheami.
