-Almmuhus-
GUOIMMUHEAPMI– Ođđa rosa stávrráin fiškalii guoli

– Ođđa rosa stávrráin fiškalii guoli

-

-

Son ii šatta nu dávjá áhkustis luhtte fitnat, muhto go fitná, de lea guollebivdu oaivvis. Dál son vuittii ođđa oaggunstávrra dainna áŋgirvuođain.

Dán vahkku mánáidoaggungilvvu vuoiti lea gávccejahkásaš Thea Marianne Kemi.

Son gottii unna sáiddáža go lei áhkustis, Berit Marie P. Eira, mielde oaggume Návvenis.

 

Ođđa rosá stávrráin

Thea Marianne ii šatta nu dávjá fitnat áhkustis luhtte go lea geasset iežaset geasseorohagas, muhto go boahtá guossái, de lea oaggun dehálaš.

– Ođđa rosá stávrrá lei vel oastán. Ii ge leat dušše stávrá rosá, muhto gárdni, rulla ja vuogga maid rosá. Dainna dohppehii unna sáiddáža, dahje geađge­noarsan mii lávet dieid gohčodit, muitala Thea Marianne áhkku, Berit Marie P. Eira.

 

Áŋgir

Eira lohká ge áhkkubisttis dakkár gii berošta bivdit. Son muitala ahte láve dávjá doppe iežaset geasse­orohagas bivdit.

– Juo, dat hoagai ovttatmano go bođii deike min lusa ahte oaggut gal galggašii. Na de ii lean munnos áddján go vuolgit oaggut, muitala Thea Marianne áhkku, Berit Marie P. Eira.

Thea Marianne lea de vahkko­vuoiti Ávvira «Guollelihkku» gilvvus, ja beassá viežžalit alcces vel nuppi ođđa stávrrá.

 

Ii luossagonagas

Mannan vahkku ii leat oktage dieđihan luosa Ávvira «Luossa­gonagas/dronnet» gilvui. Dat mielddisbuktá ahte ii oktage oaččo mannan vahkku ovddas Ávvira Luossagonagas/dronnet gahpira.

 

Beare báhkka


Govven: Astrid Helander (vuorkágovva)

Ávvira mielbargi riŋge dovddus luossabivdái Kárášjogas, Halvdan Næssii, gullan dihtii mii sáhttá leat ágga go eai leat goddán luosaid.

– Beare báhkka! Go ná báhkka lea, ii de luossa vuoja. Unnán áibmu čázis dagaha ahte luossa maid vuoimmehuvvá ja unnán lihkada, lohká son.

– Eai ge hal dál veaje bivdit ge čuožžut jogas, go ná báhkka lea, lasiha son vel.

 

Čiekŋalasas

Son lohká ahte dákkár báhkkan čuožžu luossa aivve dain čiekŋaleamos báikkiin, ja doppe lea váddáseappot oažžut dohppet, dasa lassin go vel lea lodji luossa.

– Leat maid ájanjálmmiin luosat dál, gokko galbma ája golgá johkii, lohká son.

– Mun in ieš gal gille bivdit, go lea maid nu unnán luossa jogas. Dál gal áiggun jávrái vuolgit bivdit, in gille jogain dádjut, lohká son vel loahpas.

-Almmuhus-