Bargolávdegoddi lea dál sádden láhkaásahusevttohusa sámi vuođđoskuvlaoahpaheaddjioahpuid másterdási rámmaplánas Oahpahusdepartementii. Evttohusas rahpet vejolašvuođa álggahit vuođđoskuvlaoahpaheaddjioahpu julevsámegillii ja lullisámegillii.
Bargolávdegoddi lea dál sádden láhkaásahusevttohusa sámi vuođđoskuvlaoahpaheaddjioahpuid másterdási rámmaplánas Oahpahusdepartementii. Evttohusas rahpet vejolašvuođa álggahit vuođđoskuvlaoahpaheaddjioahpu julevsámegillii ja lullisámegillii.
Oahpahusdepartemeantta lea bidjan johtui ráhkadit ođđa vihtta jagi sámi vuođđoskuvlaoahpaheaddjioahpu mat galget álggahuvvot 2017 čavčča. Dan olis leat nammadan lávdegotti man mandáhttan lea leamaš buvttihit Láhkaásahusevttohusa sámi vuođđoskuvlaoahpaheaddjioahpuid 1.-7. ceahki ja 5.-10. ceahki rámmaplánaide.
Julevsámegillii ja lullisámegillii
Láhkaásahusa árvalusas lea sámegiella váldooahpahusgiellan Sámi vuođđoskuvlaoahpaheaddjioahpuin. Nu lea maiddái oahpu dáláš doaibmi rámmaplánain. Dál árvala lávdegoddi ahte ásahusat mat fállet julev- ja máttasámegielat oahpuid sáhttet spiehkastit njuolggadusas mas váldooahpahusgiellan lea sámegiella. Ulbmil dáinna árvalusain lea addit vejolašvuođa álggahit vuođđoskuvlaoahpaheaddjioahpu maiddái julevsámegillii ja lullisámegillii, main lea dál nu váttis gielladilli ahte ii sáhte vuordit olles oahpu fállat dáidda sámegielaide.
Deattuhit máŋggagielat ja máŋggakultuvrrat sajádaga
Lávdegoddi evttoha maiddái deattuhit nannoseappot sámi, eamiálbmot, máŋggagielat ja máŋggakultuvrrat sajádaga rámmaplánas. Árvalusas boahtá ovdan ahte sámi vuođđoskuvlaoahpaheaddji oahpus masterdásis galgá oahpaheaddjiámmáhis leat sámi- ja eamiálbmotkonteaksta guovddážis ja oahpus galget kandidáhtat háhkat nana máhtu sámi diliin ja makkár sajádat eamiálbmogiin lea riikkaidgaskasaččat.
Golbma mánu bargoáigi árvalusain
Lávdegotti lea jođihan Pigga Keskitalo. Lávdegottis leat leamaš muđui lahttun Laila Oskarsson, Per Ravna, Trond Are Anti, Asbjørn Kolberg, Hanna Outakoski ja Beatrice Fløystad. Lávdegottis lea leamaš 3 mánu bargoáigi rámmaplána árvalusain miessemánu 1. beaivái 2016. Oahpahusdepartemeanta bidjá árvalusaid gulaskuddamii.
