Boares rusttet lei badjel 70 jagi boaris.
Iŋggášguolban leaira lea ožžon ođđa ođasmahtton ráidnenrusttega. Ovddeš 1950-logu rusttet lea molsojuvvon ođđaáigásaš ja doaimmalaš rusttegii.
Rusttet lea jođus ja dál čađahit proseassarusttega dárkilastimiid.
– Ođđa ráidnenrusttegiin lea Suodjalus unnidan jahkásaš doaibmagoluid 2,7 miljovnna ruvnnus 200 000 ruvdnui. Dainna leat hirbmat duđavaččat, dadjá Forsvarsbygg prošeaktajođiheaddji, Espen Steien preassadieđáhusas.
Leamaš gitta guovvamánu rájes
Boares rusttet ii leat leamaš jođus guovvamánu rájes. Buot proseassa lea sirdon ja lea goivojuvvon eatnan vuollái, muhto dan sáhttá hálddašit siste. Dat mearkkaša ahte muohta ja eará dálki hárve šaddá váttisvuohtan hálddašeapmái.
Entreprenevrrat
Sii geat leat bargan ođđa ráidnenrusttega huksemiin leat entreprenevrrat Arctic Entreprenør AS Leavnnjas ja Ipec Miljø AS (vuolleentreprenevra) Birkelandas, Sørlánddas.
Oktiibuot lea ođđa ráidnenrusttet máksán sullii 31 miljovnna ruvnnu.