Sámediggi álggaha ođđa fitnodatovddidanprográmma «Faamoe» hutkás ealáhusaid várás Sámis. Mihttomearrin lea buoridit dietnasa mearkagálvvu ja vuovdima fokuseremiin.
Sámediggi álggaha ođđa fitnodatovddidanprográmma «Faamoe» hutkás ealáhusaid várás Sámis. Mihttomearrin lea buoridit dietnasa mearkagálvvu ja vuovdima fokuseremiin.
«Faamoe» mearkkaša fápmu ja váldi máttasámegillii ja lea prográmma sámi hutkás fitnodagaid várás mat háliidit buoridit gánnáhahttivuođa ja ahtanuššama.
Vuosttaš prográmmas lea fokus fitnodagaide mat buvttadit dávviriid ja stohpočiŋaid.
– Sámedikki mihttomearri hutkás ealáhusain lea ahte eanet aktevrrat mat dahket gievrras ja gánnáhahtti fitnodagaid birget buorebut. Danne almmuhit mii prográmma mii heive dasa, dadjá sámediggepresideanta Aili Keskitalo.
Juohke fitnodat oažžu sierra čuovvuleami
Sámediggi čilge ahte «Faamoe» oktavuođas áigu rehketdoallodoaimmahat analyseret daid fitnodagaid rehketdoalu mat váldojuvvojit mielde prográmmii ja buktet buoridanevttohusa gánnáhahttivuhtii.
Dát lea áidnolunddot vejolašvuohta sámi fitnodagaide.
– Buot fitnodagain leat sierra dovdomearkkat eaige leat ovttaláganat. Danne orru min mielas dárbu individuála dásis čuovvulit iešguđege fitnodagaid, dadjá sámediggepresideanta.
«Faamoe» oktavuođas ožžot fitnodagat maid bagadusa mearkagálvohuksemis movt vuovdit ja viiddidit profešonealla fierpmádaga.
Váldofokus buoridit dietnasa
– Jos fitnodat galggaš šaddat gánnáhahttin, de berre ovttaolbmofitnodaga dienas leat badjel miljon ruvnno. Váldofokus «Faamoe» oktavuođas lea danne dietnasa buorideapmi. Dan geažil loahpahuvvo čoagganeapmi Oslo Design Fair meassuin borgemánus 2020, gos sámi fitnodagat duođai ožžot vejolašvuođa oahpásmuvvat ja dahkat šiehtadusaid vuvdiiguin mat vuvdet viidáseappot, čilge Sámediggi preassadieđáhusas.
Vihtta válljejuvvon fitnodaga besset mielde
Fitnodatovddasteaddjit, geaid mielas dát prográmma orru heivemin sin doibmii, fertejit doamihit ohcat, go ohcanáigemearri sámi fitnodagaide ohcat searvat «Faamoe» prográmmii lea geassemánu 11. beaivvi.
– Vihtta válljejuvvon fitnodaga šaddet ovdanástin eará sámi fitnodagaide, mat galget dihkkádit geainnu meinnestuvvi ealáhushutkin. Mii dárbbašat sámi fitnodagaid mat sáhttet doaibmat ráđđeaddin eará sámi gávppašeddjiide go sii dovdet sámi kultuvrra ja hástalusaid gávppálaš doaimma oktavuođas, dadjá sámediggepresideanta Aili Keskitalo.
