Skánitlaš Lásse-Ivvár Erkke lea nammaduvvon Sámediggeráđi ođđa politihkalaš ráđđeaddin.
Skánitlaš Lásse-Ivvár Erkke lea nammaduvvon Sámediggeráđi ođđa politihkalaš ráđđeaddin.
Sámediggepresideanta Aili Keskitalo lea nammadan Lásse-Ivvár Erke dahje Eirik Larsena Sámediggeráđi politihkalaš ráđđeaddin.
– Lean hui giitevaš luohttámuša ovddas ja illudan bargagoahtit Sámedikki sámepolitihkain, maŋŋel go lean máŋga jagi bargan eará bargguid, lohká Lásse-Ivvár Erke, Sámedikki preassadieđáhusas.
Sámeráđis Sámediggái
Lásse-Ivvár Erke bargá dál Sámeráđi olmmošvuoigatvuođaid ossodaga jođiheaddjin.
Son lea jurista, ja čađahii masteroahpus riektediehtagis UiT Norgga Árktalaš universitehtas.
Son barggai Gielda- ja ođasmahttindepartemeantta Sámi- ja minoritehtapolitihkalaš ossodagas 2011-2016:s.
Nanne barggu
Ođđa politihkalaš ráđđeaddi bargagoahtá Guovdageainnus ođđajagemánu 1. beaivvi rájes.
Lásse-Ivvár Erke lea nammaduvvon Sámediggeráđi ráđđeaddin 2017-2021 áigodahkii.
Sámediggepresideanta Aili Keskitalo illuda ovttasbargagoahtit suinna.
– Lásse-Ivvár Erke lea čeahppi, sus lea nanu fágalaš duogáš ja viiddis hárjáneapmi. Son nanne min politihkalaš barggu vuoigatvuođaprofiilla, lohká Keskitalo.
